ტიტანიკის რეჟისორმა, ჯეიმს კამერონმა, რამდენიმე დღის წინ ატლანტის ოკეანეში გაუჩინარებული წყალქვეშა ნავის გარშემო დატრიალებულ ტრაგედიაზე ისაუბრა, რომლის მგზავრებიც ჩაძირული ტიტანიკისკენ მიემართებოდნენ. ოსკაროსანი რეჟისორი, რომელსაც ასევე ოკეანის სიღრმეში ყვინთვის მრავალწლიანი გამოცდილება აქვს, იმ რისკებზე საუბრობს, რომელიც ამ წამოწყებას თან ახლდა.

კამერონმა, რომელიც წყალქვეშა მოწყობილობების დიზაინერიცაა, რამდენიმე წლის წინ ნავი დააპროექტა, რომლის მეშვეობითაც ოკეანეში ტიტანიკზე სამჯერ უფრო ღრმა ადგილას დაეშვნენ. მისი თქმით, როგორც ამ სფეროში გამოცდილ ადამიანს, კარგად ესმის ის უსაფრთხოების პროტოკოლი, რომელიც მსგავსი ექსპერიმენტების დროს დაცული უნდა იყოს.

"წყალქვეშა ინჟინერიის სფეროში ამ წამოწყებას ძალიან დიდი შეშფოთება მოჰყვა. ექსპერტები წერილებსაც კი სწერდნენ კომპანიას იმის სათქმელად, რომ ასეთ ღრმა ადგილას ტურისტული ნავით ჩასვლა ძალიან სახიფათოა და ამისთვის ჯერ შესაბამისი სერტიფიკატების აღება და მსგავსი პროცედურების გავლა იყო საჭირო", — ამბობს კამერონი ABC-სთან ინტერვიუში

რეჟისორმა წყალქვეშა ნავის ტრაგედიისა და ტიტანიკის ჩაძირვის მსგავსების შესახებაც ისაუბრა. თავად კამერონმა ტიტანიკის გადასაღებად დაახლოებით 30-ჯერ ჩაცურა გემის ფსკერამდე და იმასაც კი ამბობს, რომ ტიტანიკის ბორტზე უფრო მეტი დრო აქვს გატარებული, ვიდრე თავის დროზე თავად გემის კაპიტანს.

"ტიტანიკის უბედური შემთხვევისა და ამ ტრაგედიის მსგავსებით გაოგნებული ვარ. ტიტანიკის კაპიტანი აისბერგის შესახებ არაერთხელ იყო გაფრთხილებული, თუმცა ამის მიუხედავად, მან მაინც გადაწყვიტა, გეზი არ ეცვალა და უკუნეთ ღამეში გემი სრული სისწრაფით აისბერგისკენ წასულიყო, რამაც უამრავი ადამიანის სიკვდილი გამოიწვია. ამ ტრაგედიის შემთხვევაშიც, უამრავი გაფრთხილება იყო გაცემული. ეს ფაქტი უბრალოდ დაუჯერებელია", — აცხადებს რეჟისორი.

კომპანია OceanGate-ის ტურისტული წყალქვეშა ნავი, რომელიც ჩაძირული ტიტანიკისკენ მიემგზავრებოდა, 18 ივნისს გაუჩინარდა. ბორტზე მყოფ 5 ადამიანთან კავშირი წყალში ჩაშვებიდან საათისა და 45 წუთის შემდეგ გაწყდა. მას შემდეგ დაწყებული ფართომასშტაბიანი სამძებრო სამუშაოების პროცესში მაშველებმა ძლიერი ხმაურიც დააფიქსირეს, რომელიც, ერთ-ერთი ვარაუდით, აფეთქებას შეიძლება მოჰყოლოდა. აშშ-ის სანაპირო დაცვის ინფორმაციით, გაუჩინარებული ტიტანის ყველა მგზავრი გარდაცვლილია.