რატომ არის მნიშვნელოვანი: 6 ივნისიდან 3000-ზე მეტი მაღაროელი და მათი ოჯახის წევრები მძიმე სამუშაო პირობების გაუმჯობესების მოთხოვნით საპროტესტო აქციებს მართავენ.

  • მეხუთე დღეა, პროტესტმა თბილისში, პარლამენტის წინ გადმოინაცვლა.
  • გაფიცულების ნაწილმა უვადო შიმშილობა გამოაცხადა.
  • ერთ-ერთმა მაღაროელმა, გიორგი კუპატაძემ, თვალები ამოიკერა, კიდევ ერთ გაფიცულს კი პირი აქვს ამოკერილი.
  • საუბარია ისეთი ბაზისური შრომითი უფლებების დაცვაზე, როგორებიცაა: ხელფასის ზრდა ინფლაციის გათვალისწინებით, შრომის უსაფრთხოება, აღჭურვილობისა და სპეცტანსაცმლის შეცვლა, სანგრების განიავება, საშხაპეების მოწყობა, ახალი, მეტად დატვირთული და ნაკლებად ანაზღაურებული სამუშაო გრაფიკიდან, ძველ განრიგზე დაბრუნება.

ჯორჯიან მანგანეზი ირწმუნება, რომ თანამშრომლების ჯანმრთელობის დაცვა და უსაფრთხოება მათი მთავარი ღირებულებაა.

  • "კომპანია მზად არის, თანამშრომელთა პასუხისმგებლობის გათავისებისა და სრული კონსენსუსის შემთხვევაში, ჭიათურის მაღაროები მაღაროელებს მართვაში გადასცეს", — წერენ ისინი.
  • ჯორჯიან მანგანეზის განცხადებით, მათი მიზანია, შექმნილი კრიზისული სიტუაცია დროულად მოგვარდეს, შეწყდეს პროტესტის რადიკალური ფორმა და თანამშრომლები სამუშაო პროცესს დაუბრუნდნენ.