საქართველოს ნაკრებმა ევროპის 2024 წლის შესარჩევი ეტაპის მორიგი მატჩი თემურ ქეცბაიას კვიპროსთან ლარნაკაში ჩაატარა და გამარჯვება მოიპოვა. გოლები გიორგი მიქაუტაძემ და ზურიკო დავითაშვილმა გაიტანეს.

აღსანიშნავია, რომ პირველი რეალური მომენტი მასპინძლებს ჰქონდათ, გიორგი მამარდაშვილის შეცდომის შემდეგ, მაგრამ ამ ეპიზოდში მამარდაშვილმა თავადვე იყოჩაღა და მეტოქის დარტყმა მოიგერია, ხოლო დამატების შემდეგ, ოთარ კაკაბაძემ ბურთი კარის ხაზიდან გამოიტანა. ამის შემდეგ ხვიჩა კვარაცხელიას ორი კარგი შანსი ჰქონდა, მაგრამ ნაპოლის ვარსკვლავის ორივე დარტყმა კარს გადასცდა. კვარაცხელიას პასის შემდეგ, მომენტი გიორგი ჩაკვეტაძესაც ჰქონდა, თუმცა კვიპროსი მეკარემ გადაარჩინა. ამას გიორგი მიქაუტაძის გოლი მოჰყვა. ცოტა ხანში კი ლუკა ლოჩოშვილის დარღვევის გამო, პენალტი დაინიშნა და იოანის პიტასმა ანგარიში გაათანაბრა.

საქართველოს ნაკრებმა მეორე გოლი 84-ე წუთზე გაიტანა, რომელიც შეცვლაზე შემოსულმა ზურიკო დავითაშვილმა შეასრულა. მან ბრწყინვალე დარტყმით ანგარიში 1:2 გახადა და საქართველოს ნაკრებს გამარჯვება მოუტანა. საგოლე პასი ასევე თადარიგიდან ჩართულმა საბა ლობჟანიძემ გააკეთა.

საგულისხმოა, რომ საქართველოს ნაკრებს უკვე 7 საგარეო მატჩია არ წაუგია. ნაკრებმა სტუმრად ბოლო მარცხი 2021 წლის 8 სექტემბერს ბულგარეთთან ამხანაგურ შეხვედრაში განიცადა.

საქართველოს ნაკრებმა ორი მატჩის შემდეგ 4 ქულას მოუყარა თავი, ესპანეთს გადაასწრო და მეორე ადგილზე გადავიდა. ლიდერი 3 მატჩიდან 3 გამარჯვებით შოტლანდიაა, რომელსაც საქართველო 20 ივნისს გლაზგოში ეწვევა. მატჩი ჩვენი დროით 22:45 საათზე დაიწყება.

აქვე აღვნიშნოთ, რომ ეს საქართველოს ნაკრების მე-7 მატჩი იყო კვიპროსთან და ამ შეხვედრის შემდეგ ასეთი ბალანსია — 3 მოგება, 1 ფრე, 3 წაგება.

საქართველოს ბანკი ქართული ფეხბურთის მხარდამჭერი და ეროვნული ნაკრების მთავარი სპონსორია!