ვინ თქვა, კატები მორცხვები და უკარებები არიანო?!

ყოველ შემთხვევაში, ამ ამბის მთავარი გმირი, წითური ფისო, სახელად სოქსი, ასეთი სულაც არ გახლავთ. სოქსმა, რომელიც ინგლისში, კენტის საგრაფოს პატარა ქალაქში ცხოვრობს, ერთ მშვენიერ დღეს მოგზაურობა გადაწყვიტა. კატა ჯერ სხვა დასახლებაში გაჰყვა უცხო მანქანას, იქიდან კი მეორე მანქანას დაემგზავრა ლონდონისკენ.

სოქსის პატრონი, ჯესიკა როუ, ჰყვება, რომ თავისი კატის უცნობი ადამიანების მანქანაში ჩახტომის შესახებ კვირადღეს აცნობეს. ქალს თურმე ვეტერინართან ჰყავდა მიყვანილი ფისო, როცა ეს უკანასკნელი გაქცეულა. როგორც ჩანს, სოქსისთვის ეს უჩვეულო საქციელი არაა, რადგან პატრონი მას მაინცდამაინც აღშფოთებული არ შეხვედრია.

"ვიხუმრე, მთავარია, ლონდონისკენ მიმავალ მატარებელს არ გაჰყვეს-მეთქი", — იხსენებს ჯესიკა.

მაგრამ რა იცოდა, რომ სოქსს ზუსტად ეს გეგმა ჰქონდა. მისი განზრახვის შესახებ კი იმ უცნობმა შეიტყო, რომელსაც ფისო უბოდიშოდ დამგზავრებია. ჯეკი ო'კონორი მანქანით შინ ბრუნდებოდა, როცა სარკეში შეამჩნია, როგორ ამოყო სავარძლებს შორის თავი ონავარმა კატამ.

ფოტო: Handout

საბოლოოდ, სოქსი, რომელსაც ამასობაში 100 კილომეტრზე მეტი გაუვლია, შინ მშვიდობით დაბრუნდა. კიდევ ერთხელ.

ჯესიკას თქმით, წინათ კატა მას ისეთი უცნაური ადგილებიდანაც კი დაუბრუნებია, როგორიცაა ღამის კლუბი, სამუშაო ოფისი, საცურაო აუზი და საქაბაბე. მეტიც, სოქსის თავგადასავლებისთვის პატრონმა ფეისბუქგვერდი შექმნა, რადგან ადგილობრივი თემის გვერდზე მოხეტიალე ფისოს შესახებ ორ კვირაში რვაჯერ დაუწერიათ თურმე.