SOU Festival 2017-ის ორთვიანი პროგრამა დასასრულს უახლოვდება. ფესტივალის ფარგლებში კიდევ სამი მუსიკალური საღამო ჩატარდება, რომელშიც სტივენ ო’მელი, Xylouris White და კეიჩირო შიბუია და ჰაცუნე მიკუ მიიღებენ მონაწილეობას.

დღეს, 27 ივნისს, სამეფო უბნის თეატრში სტივენ ო'მელი დაუკრავს. პოსტ-მეტალის მსმენელთათვის გიტარისტი სთივენ ო’მელი საკულტო მუსიკოსია, თუმცა მისი შექმნილი მუსიკის უდიდესი ნაწილი არ განეკუთვნება პოსტ-მეტალს: მისი სოლო-კარიერა და სხვა კოლაბორაციები, ძირითადად, დრონზეა ორიენტირებული. გიტარის ტემბრი სიეტლელი არტისტის ექსპერიმენტებში იმდენად ამოუწურავი და რესურსებით სავსეა, რომ ის მას ცალკეულ მუსიკალურ ფორმად იყენებს. მეტალის პირქუში, მძიმე და სიბნელით მოცულ განწყობებს ო’მელი ახლა მეტი სიღრმით და უფრო ფართო მუსიკალურ მასშტაბებში ეძებს.

ფოტო: Unknow

მისი კოლაბორაციების გრძელი სია ისეთ სახელებს უკავშირდება როგორებიცაა: Merzbow, იოჰან იოჰანსონი, Nurse With Wound, აარონ თერნერი და მრავალი სხვა. ის ვიზუალური ხელოვნების სფეროშიც მოღვაწეობს და საკუთარი ალბომების ყდებს ქმნის, ხოლო მისი ლეიბლი Ideologic Organ ვიზუალური ხელოვნებით, ფილოსოფიითა და საინტერესო რელიზებით გაჯერებული ექსპერიმენტული მედია-პროდუქტია.

ფოტო: xylouris white

ხვალ, 28 ივნისს კი, ნოდარ დუმბაძის სახელოობის მოზარდა მაყურებელთა თეატრში, Xylouris White წარსდგება მსმენელის წინაშე. ეს პროექტი პოსტ-როკისა და ბერძნული ფოლკლორის უნიკალური ჰიბრიდია — ბერძენი ფოლკ-მუსიკოსის, გიორგის ქსილურისისა და ცნობილი ავსტრალიური ბენდის Dirty Three-ს დრამერის, ჯიმ უაითის დუეტი. ქსილურისი კრეტული მუსიკალური ტრადიციების ყველაზე თვალსაჩინო წარმომადგენელია, ლოცვისმაგვარი ვოკალური მანერითა და დრამატიზმით. უაითი კი ცნობილი ავტორი, პროდიუსერი და ავსტრალიური პოსტ-როკ ბენდის, Dirty Three-ს დრამერია. მისი შესრულების უნიკალურმა სტილმა მნიშვნელოვანი როლი ითამაშა ნიკ ქეივის, ფი ჯეი ჰარვის, ბონი პრინს ბილისა და Cat Power-ის შემოქმედებაში. ავანტ-როკისა და ანტიკური მუსიკის შერწყმის შედეგად მივიღეთ Xylouris White, რომელიც თანამედროვე სცენაზე ექსპერიმენტული მუსიკის ერთ-ერთი გამორჩეული პროექტია.

თანამედროვე მუსიკისა და ვიზუალური ხელოვნების საერთაშორისო ფესტივალი, SOU Festival 2017, 15 მაისს დაიწყო და 5 ივლისამდე გაგრძელდება. Sou Festival 2017 "Check in Georgia-ს" ფარგლებში იმართება.