რატომ არის მნიშვნელოვანი: პრემიერმინისტრმა მთავრობის სხდომაზე თქვა, რომ მუშაობენ კანონპროექტზე, რომლის მიხედვითაც სუროგაცია მხოლოდ საქართველოს მოქალაქეებისთვის იქნება დაშვებული.

  • ღარიბაშვილის აზრით, ეს საკითხი საზოგადოების დიდ ნაწილს აწუხებს და უფრო კომპლექსურია, ვინაიდან "უკავშირდება ზოგადად ჩვენი მოქალაქეების უსაფრთხოებას, ქვეყნის იმიჯსა და ა.შ".
  • მისივე მტკიცებით, უცხოეთის მოქალაქეებს ბიზნესად აქვთ ქცეული სუროგაცია და არავითარი რეგულაცია არ არსებობს.
  • მან რამდენიმე არგუმენტი დაასახელა, რის გამოც რეგულირების საჭიროებას ხედავენ, ერთ-ერთი კი ჰომოფობიური შინაარსის იყო.
  • "არავინ არ იცის აქ დაბადებული ბავშვი ვის გაჰყავს, რომელ წყვილს გაჰყავს, არსებობს ინფორმაციები, შეიძლება ერთსქესიან წყვილებს გაჰყავთ აქ დაბადებული ბავშვები და უამრავი პრობლემა შეიძლება იყოს", — თქვა პრემიერმინისტრმა, რომელიც ბოლო პერიოდში საერთოდ არ მალავს ჰომოფობიურ მიდგომებს.

დეტალები: მაგალითად საფრანგეთი, გერმანია, ესპანეთი და კიდევ რამდენიმე ქვეყანა მოიყვანა და განაცხადა, რომ იქ სუროგაცია სრულად აკრძალულია, ხოლო ბელგიაში, გაერთიანებულ სამეფოში, დანიაში ნაწილობრივ არის დაშვებული.

  • თქვა ისიც, რომ სუროგაციასთან დაკავშირებით ძალიან ბევრი რეკლამა ვრცელდება და მოქალაქეებს "ე.წ სწრაფ ბიზნესს" სთავაზობენ.
  • "უცხოეთის მოქალაქე ვეღარ შეუკვეთავს, ასე ვთქვათ, უხეშად არ მინდა ვთქვა, მაგრამ ხდება პირდაპირ შეკვეთის განთავსება. ეს ონლაინაც არის, ძალიან ბევრი რეკლამაც ვრცელდება და ვფიქრობ, ძალიან შემაშფოთებელია ამ საკითხის რეგულირების გარეშე დატოვება", — თქვა ღარიბაშვილმა.
  • დააანონსა, რომ შესაბამისი კანონპროექტი პარლამენტში გაიგზავნება და იმედი აქვს, მხარს დაუჭერენ ამ ინიციატივას.
  • "ბევრი არის მსურველი, მე ვიცი, ვისაც შვილი არ უჩნდება, ამიტომ მიმართავენ ამ მეთოდს, სუროგაციის მეთოდს და რა თქმა უნდა, მათთვის ეს უნდა იყოს დაშვებული, საქართველოს მოქალაქეებისთვის საქართველოში. ეს რა თქმა უნდა, ერთის მხრივ, ძალიან დაეხმარება დემოგრაფიას და, ზოგადად, ვფიქრობთ, ეს შესაძლებლობა უნდა დავუტოვოთ ჩვენს მოქალაქეებს", — თქვა ირაკლი ღარიბაშვილმა.