ვების კოსმოსურმა ტელესკოპმა იუპიტერზე 10-ჯერ მასიური სუპერცხელი ეგზოპლანეტის ატმოსფეროში წყლის ორთქლის კვალს მიაგნო. ის WASP-18 b-ის სახელითაა ცნობილი და ჩვენგან 400 სინათლის წლით დაშორებული, მზის მსგავსი ვარსკვლავის გარშემო მოძრაობს, რასაც 1 დღეზე ნაკლებს ანდომებს. ეს ციური სხეული საკუთარი მნათობისგან საშუალოდ 3.1 მილიონი კილომეტრ დისტანციაზეა. შედარებისთვის, მერკურისა და მზეს შორის მანძილი 63.4 მილიონი კილომეტრია.

ამ აირის გიგანტ ეგზოპლანეტაზე ტემპერატურა დაახლოებით 2 700°C-სს აღწევს, ამიტომ იქ წყლის მოლეკულები, უმეტესწილად, იშლება. ამის მიუხედავად, მსოფლიოში უმძლავრესმა ობსერვატორიამ მისი კვალის დაფიქსირება მაინც შეძლო, რაც განსაკუთრებული სპექტრული მგრძნობელობის დამსახურებაა. უნდა ითქვას, რომ 2008 წლიდან (WASP-18 b-ის აღმოჩენიდან) დღემდე, სხვა ტელესკოპებმა, მათ შორის ჰაბლმა და TESS-მა, იგივე მონაცემები ვერ მოიპოვა.

საინტერესოა, რომ ზემოხსენებული ციური სხეულის ერთი მხარე ყოველთვის ვარსკვლავისკენაა მიბრუნებული, როგორც მთვარის — დედამიწისკენ. ეს ნიშნავს, რომ პლანეტის გარშემო ტემპერატურა ერთნაირი არაა. მაგალითად, ვების მონაცემებით დაადგინეს, რომ ყველაზე მეტად განათებული არეალი 1 100°C-ით უფრო ცხელია, ვიდრე ჩაბნელებული ნახევარსფერო. ასეთი დიდი სხვაობა მეცნიერებისთვის მოულოდნელი იყო, ამიტომ ფიქრობენ, რომ შესაძლოა, იქ ჩვენთვის ჯერ კიდევ უცნობი მექანიზმი სითბოს გადანაწილებას უშლიდეს ხელს.

ავტორთა ნაშრომი გამოცემაში Nature გამოქვეყნდა.