რატომ არის მნიშნველოვანი: დიმიტრი სამხარაძე ქართული ოცნების პოლიტსაბჭოს წევრი და უკვე მეორე მოწვევის დეპუტატია, თუმცა საზოგადოება საკანონმდებლო მოღვაწეობით ნაკლებად იცნობს, რადგან მდუმარე დეპუტატებს მიეკუთვნება.

  • ამის საპირწონედ ის ცნობილია არაეთიკური და შეურაცხმყოფელი გამონათქვამებით, ოპოზიციისა და აქტივისტების გინებით, მედიის დისკრედიტაციის მცდელობებით და რუსული კანონის მხარდაჭერით.
  • საკუთარ ფეისბუქგვერდზე ხშირად აჟღერებს ჰომოფობიურ, სექსისტურ განცხადებებსაც.
  • ის გამოესარჩლა ბერასაც მაშინ, როცა ფარული ჩანაწერები გავრცელდა და მომღერალმა მათი შინაარსი ნაწილობრივ დაადასტურა. მაშინ დეპუტატმა დაწერა: "ბერა, ნამდვილები ერთად ვართ".
  • სამხარაძე არავის "პატიობს" ქართული ოცნების კრიტიკას, მათ შორის, არც ყოფილ თანაგუნდელებს.
  • მაგალითად, გახარიას პრემიერობისას ამბობდა, რომ საქართველოს გაუმართლა მისნაირ პრემიერმინისტრში, შემდეგ კი მას ცრუპენტელას უწოდა.

რა მოხდა: დღეს, დამოუკიდებლობის დღისადმი მიძღვნილ ღონისძიებაზე სალომე ზურაბიშვილი სიტყვით გამოვიდა და პრემიერმინისტრის თანდასწრებით მთავრობის განცხადებები და გადაწყვეტილებები გააკრიტიკა.

  • პრეზიდენტმა ისაუბრა ფრენების აღდგენაზე, ოკუპაციაზე, ევროინტეგრაციაზე სერგეი ლავროვის ოჯახის ქეიფზე და ანწუხელიძისა და ოთხოზორიას ოჯახებს ბოდიში მოუხადა.
  • თქვა ისიც, რომ გაუგებარი და შეურაცხმყოფელია, როცა დღეს ვითვლით, თუ რამდენ მილიონს მოგვიტანს "ფრენების საჩუქარი".
  • პრეზიდენტის გამოსვლისას უკმაყოფილო შეძახილები გაისმა — როგორც ქართული ოცნების კიდევ დეპუტატი, ირაკლი ქადაგიშვილი ამბობს, ერთ-ერთი მას ეკუთვნოდა.
  • დეპუტატის თქმით, გააპროტესტა პრეზიდენტის სიტყვა, რადგან იგი არ შეეფერებოდა საქართველოს დამოუკიდებლობას.
  • როგორც აღმოჩნდა, ქართულ ოცნებაში ის ერთადერთი არ არის, ვინც პრეზიდენტის კრიტიკით უკმაყოფილოა.

რა იკადრა სამხარაძემ: დეპუტატმა ფეისბუქგვერდზე შეურაცხმყოფელი ტერმინოლოგიის მორიგი პოსტი გამოაქვეყნა, რომელშიც პრეზიდენტს აგენტი და მტერი უწოდა.

  • მთავარსარდალი? ჩვეულებრივი 20 დოლარიანი ნაცების საროსკიპო ტელევიზიების ექსპერტია! შემარცხვენელი ჩვენი ერის! მტერია ჩვენი სახელმწიფოსი, დამოუკიდებლობის, სუვერენიტეტის! გახაზული აგენტი, რომელსაც არცერთი სიტყვა არ უთქვამს, რომ საქართველო დამოუკიდებელი იყოს, ძლიერი სახელმწიფო! პარტნიორების თანაბარუფლებიანი პარტნიორი კი არა, შნირები, ცალ ფეხზე მდგომი მონები უნდა ვიყოთო! მართლა ამის სულ ყველაფრის "ტყება", — დაწერა მან.

გაიგეთ მეტი: 5 რამ, რაც დიმიტრი სამხარაძის შესახებ უნდა იცოდეთ