გავლენიანმა ბრიტანულმა მედიამ BBC-მ ყველა დროის 100 საუკეთესო საბავშვო ნაწარმოები დაასახელა. რეიტინგის შესადგენად გამოცემამ 56 ქვეყნიდან 177 ექსპერტი მოიწვია. ასეთი მასშტაბური გამოკითხვები სხვადასხვა საკითხზე BBC-ის გასულ წლებშიც ჩაუტარებია, წლევანდელ თემად საბავშვო ლიტერატურის არჩევას კი წინაპირობაც ჰქონია.

"ამ გამოკითხვისთვის შესაფერისი დრო იმიტომაცაა, რომ ბოლო ხანებში ბევრს მსჯელობენ, როგორი დაუფასებელია საბავშვო წიგნები საუფროსო ლიტერატურის გვერდით", — წერს BBC.

საბავშვო ლიტერატურის დასაფასებლად გამოვლენილი 100 საუკეთესო წიგნის ჩამონათვალში, ბევრ ნაცნობ სახელთან ერთად, ქართველი მკითხველისთვის უცნობ ავტორებსაც შეხვდებით. საუკეთესო ათეული კი ასე გამოიყურება:

  1. მორის სენდაკის საძაგელი არსებების ქვეყანაში
  2. ლუის კეროლის ელისის თავგადასავალი საოცრებათა ქვეყანაში
  3. ასტრიდ ლინდგრენის პეპი გრძელწინდა
  4. ანტუან დე სენტ-ეგზიუპერის პატარა პრინცი
  5. ჯონ რ. რ. ტოლკინის ჰობიტი
  6. ფილიპ პულმანის ჩრდილოეთის ციალი
  7. კ. ს. ლუისის ლომი, კუდიანი და გარდერობი
  8. ა. ა. მილნის ვინი პუჰი
  9. ე. ბ. უაითის შარლოტის ქსელი
  10. როალდ დალის მატილდა

საქვეყნოდ ცნობილ წიგნებს ათეულს გარეთაც მრავლად შეხვდებით. მაგალითად, ჯოან როულინგის ჰარი პოტერი და ფილოსოფიური ქვა ჩამონათვალში მე-13 ადგილზეა, ფრენკ ბაუმის ოზის ჯადოქარი კი — 85-ე ადგილზე.

სხვადასხვა დროს BBC-ის ასევე ჩაუტარებია გამოკითხვები 21-ე საუკუნის 100 საუკეთესო სერიალის ანდაც ქალი რეჟისორების 100 საუკეთესო ფილმის გამოსავლენად.