იუსტიციის უმაღლესი საბჭოს მდივნის თანამდებობაზე ლევან მურუსიძეს თბილისის საქალაქო სასამართლოს თავმჯდომარე გიორგი მიქაუტაძე ჩაანაცვლებს. გადაწყვეტილება დღეს, 24 ივნისს, მოსამართლეთა კონფერენციაში მონაწილეთა უმრავლესობამ ფარული კენჭისყრით მიიღო.

იუსტიციის უმაღლესი საბჭოს მდივანი 4 წლის ვადით აირჩევა.

იუსტიციის უმაღლესი საბჭოს ცნობით, გიორგი მიქაუტაძე 1982 წლის 6 სექტემბერს დაიბადა. 204 წელს დაამთავრა თბილისის სახელმწიფო უნივერსიტეტის იურიდიული ფაკულტეტი, 2010-2011 წლებში კი იუსტიციის უმაღლესი სკოლის მსმენელი იყო. სამუშაო გამოცდილება:

  • 2016 წლის მარტიდან დაინიშნა თბილისის საქალაქო სასამართლოს თავმჯდომარედ;
  • 2015 წლის დეკემბრიდან არის თბილისის საქალაქო სასამართლოს ადმინისტრაციულ საქმეთა კოლეგიის თავმჯდომარე;
  • 2012 წლის იანვრიდან არის თბილისის საქალაქო სასამართლოს მოსამართლე;
  • 2010 წელს მუშაობდა საქართველოს უზენაესი სასამართლოს ადმინისტრაციულ საქმეთა პალატის სამდივნოს უფროსად;
  • 2006-2010 წლებში მუშაობდა თბილისის ისანი-სამგორის რაიონული პროკურატურის პროკურორად;
  • 2006 წელს მუშაობდა თბილისის ისანი-სამგორის რაიონული პროკურატურის სტაჟიორად;