არასამთავრობო ორგანიზაციები ხელისუფლების მიერ თბილისსა და მოსკოვს შორის ფრენებისთვის ნებართვის გაცემას კანდიდატის სტატუსის მოპოვების საბოტაჟად განიხილავენ.

რატომ არის მნიშვნელოვანი: ორგანიზაციების განცხადებით, ევროკავშირმა მკაფიოდ დააფიქსირა, რომ ის და მისი პარტნიორები არ უშვებენ ფრენებს რუსეთიდან, ან რუსეთში.

  • შესაბამისად, საქართველოს მთავრობის ეს გადაწყვეტილება შეშფოთებას იწვევს საქართველოს ვალდებულების კუთხით, რომ შეესაბამებოდეს საგარეო პოლიტიკაში ევროკავშირის დადგენილებებს, როგორც ეს ასოცირების შეთანხმებითაა გათვალისწინებული.
  • არასამთავრობო სექტორის შეფასებით, ეს ქართველი ხალხის 89%-ის ნებისა და საქართველოს კონსტიტუციის 78-ე მუხლის საწინააღმდეგო ქმედებაა, რაც მიზნად ისახავს ქვეყნის საგარეო კურსის ცვლილებას.

დეტალები: განცხადების ხელმომწერთა შეფასებით, მოსახლეობა უკვე ზარალდება მთავრობის მიერ არჩეული საგარეო კურსის და რუსული იმიგრაციის გამო, რამაც ფასების მკვეთრი მატება და ინფლაცია გამოიწვია.

  • "მოვუწოდებთ ხელისუფლებას, შეწყვიტოს კანდიდატის სტატუსის საბოტაჟი, დაუყოვნებლივ თქვას უარი საქართველოს ინტერესების დამაზიანებელ გადაწყვეტილებაზე რუსეთთან პირდაპირი ფრენების დაწყების შესახებ", — ნათქვამია ორგანიზაციების მიერ გამოქვეყნებულ განცხადებაში.