ლეიკემიით დაავადებულმა ბრიტანელმა ქალმა 90 წლის იუბილეზე 4267 მეტრის სიმაღლიდან გადმოხტომა გადაწყვიტა, რათა ქველმოქმედებისთვის ფული შეეგროვებინა. 90 წლის შირლი რობინსონს ქრონიკული ლეიკემიის დიაგნოზი გასულ წელს დაუსვეს. ამის შემდეგ ქალი აქტიურადაა ჩართული ქველმოქმედებაში, რითაც უსახლკაროებს ეხმარება.

შირლიმ საქველმოქმედო ორგანიზაციისთვის 6200 დოლარზე მეტი უკვე შეაგროვა და ის გაჩერებას არც ახლა აპირებს. საქველმოქმედო ორგანიზაცია შირლის დიდ მადლობას უხდის, რადგან 90 წლის ქალი უსახლკაროების დასახმარებლად უამრავ აქტივობაშია ჩართული, მათ შორის კი ერთ-ერთი პარაშუტით ფრენა იყო.

ფოტო: BBC

"გვინდა, დიდი მადლობა გადავუხადოთ შირლის საკმაოდ დიდი რაოდენობის თანხისთვის, რომლის შეგროვებაც მან შეძლო. შირლის შემოწირულება სასიცოცხლო დახმარება გაუწევს იმ ადამიანებს, რომლებიც უსახლკაროდ დარჩენის მაღალი რისკის ქვეშ არიან", — ვკითხულობთ საქველმოქმედო ორგანიზაციის განცხადებაში.

90 წლის ბებოს პარაშუტით ფრენის გამოცდილება ძალიან მოეწონა. "ეს ნამდვილად ისეთი რამ იყო, რითაც შვილიშვილები დამიმახსოვრებენ", — ამბობს შირლი.