პარლამენტის თავმჯდომარე, შალვა პაპუაშვილი ევროპის სოციალისტური პარტიის დატოვებასთან დაკავშირებით ქართული ოცნების გადაწყვეტილებას გამოეხმაურა.

დეტალები: პაპუაშვილის მტკიცებით, მიღებული გადაწყვეტილება ხელს შეუწყობს ევროპარლამენტში ქართული ოცნების პოზიციების ნათლად წარმოჩენას.

  • იგი ევროპელი სოციალისტების კრიტიკას გამოეხმაურა, რომელიც საქართველოს პრემიერმინისტრმა კონსერვატორთა ტრიბუნიდან ჰომოფობიური და პოპულისტური გზავნილების გაჟღერების გამო მიიღო.
  • "ჩვენი საზოგადოებისთვის არის მიუღებელი, როცა ასეთი ფასეულობები კითხვის ქვეშ დგება. ამიტომ, ალბათ, სხვა გადაწყვეტილების მიღება შეუძლებელიც იქნებოდა".
  • მისი მტკიცებით, ევროპელი სოციალისტების მხარდაჭერას აქამდეც ვერ გრძნობდნენ.
  • "ევროპარლამენტის მხრიდან სხვადასხვა რეზოლუცია იქნა მიღებული, რომელსაც სოციალისტების ნაწილმა ზოგჯერ მხარიც კი დაუჭირა. არც გაუკრიტიკებიათ დიდად, რაც აბსოლუტურად მიუღებელია, რადგან დადასტურებულად იყო დეზინფორმაციული ჩანაწერები", — განაცხადა მან.

რა მოხდა: 4 მაისს საქართველოს პრემიერმინისტრი უნგრეთის დედაქალაქში მიმდინარე კონსერვატორთა კონფერენციის ერთ-ერთი სპიკერი იყო, სადაც ღარიბაშვილმა საერთაშორისო ტრიბუნა ჰომოფობიური გზავნილების გასაჟღერებლად გამოიყენა.

  • ევროპელმა სოციალისტების პარტიამ დაგმო ირაკლი ღარიბაშვილის გადაწყვეტილება, კონსერვატიული პოლიტიკური სამოქმედო კონფერენციაში (CPAC) მიღების შესახებ და თქვა, რომ ეს ეწინააღმდეგება ევროპულ და პროგრესულ ღირებულებებს.
  • მათ განაცხადეს, რომ პოლიტიკურ გაერთიანებაში ქართული ოცნებისთვის სტატუსის შეჩერებაზე ერთსულოვნებაა და ოცნებას არავინ უჭერს მხარს.