სამოქალაქო საზოგადოების ორგანიზაციები ნიკა გვარამიას საქმეზე განცხადებას ავრცელებენ.

რატომ არის მნიშვნელოვანი: 3 მაისი პრესის თავისუფლების საერთაშორისო დღეა.

  • მედიამენეჯერი ნიკა გვარამია 1 წელია პატიმრობაში იმყოფება და ბრალად ედება სამსახურებრივი უფლებამოსილების ბოროტად გამოყენება.
  • მთავარი არხის გენერალურ დირექტორს სასჯელის სახით 3 წლითა და 6 თვით თავისუფლების აღკვეთა განესაზღვრა.

დეტალები: სამოქალაქო სექტორის შეფასებით, ნიკა გვარამიას მიმართ არსებული სამართალწარმოება პოლიტიკურად მოტივირებულია და მიზნად ისახავს კრიტიკული ხმის ჩახშობას.

  • სამოქალაქო ორგანიზაციები აცხადებენ, რომ გვარამიას პატიმრობას გამოხატვის თავისუფლებაზე მსუსხავი ეფექტი აქვს და ქმნის თავისუფალი სივრცის შევიწროების იმგვარ პრეცედენტს, რომელსაც გავლენა აქვს სახელმწიფოში პლურალისტული მედია გარემოს არსებობაზე.

საქმის მონიტორინგიდან გამომდინარე ორგანიზაციები შემდეგ დასკვნებს აკეთებენ:

  • პირველი ინსტანციის სასამართლოში გვარამიას საქმეზე განაჩენი გამოიტანა მოსამართლემ, რომლის ობიექტურობასა და მიუკერძოებლობასთან დაკავშირებით არსებობდა საფუძვლიანი კითხვები.
  • პროკურატურის მიერ ნიკა გვარამიასთვის წარდგენილი ბრალდება არ შეიცავდა სისხლისსამართლებრივი პასუხისმგებლობის დაკისრებისთვის საკმარის მკაფიო ნიშნებს.
  • სასამართლო სხდომის დარბაზში გამოკვლეული არც ერთი მტკიცებულება არ ქმნიდა საფუძველს, ქმედებაში დანაშაულის ნიშნების იდენტიფიცირებისთვის.

ორგანიზაციები მოითხოვენ: საქართველოს უზენაესმა სასამართლოს დროულად, ობიექტურად და მიუკერძოებლად განიხილოს ნიკა გვარამიას წინააღმდეგ მიმდინარე სისხლის სამართლის საქმე;

  • "საქართველოს პრეზიდენტს, საქართველოს მიმართ ევროკომისიის რეკომენდაციების გათვალისწინებით, და საქმეზე საერთაშორისო და ადგილობრივი ორგანიზაციების, სახალხო დამცველის შეფასებების შესაბამისად, მიიღოს გადაწყვეტილება ნიკა გვარამიას შეწყალების თაობაზე", — ვკითხულობთ განცხადებაში.
  • სამოქალაქო სექტორის შეფასებით, ევროკომისიის საგარეო ქმედებათა სამსახურიც მედიის მფლობელების მიმართ აღძრულ სისხლის სამართალწარმოების უმაღლეს საკანონმდებლო სტანდარტებთან შესაბამისობის აუცილებლობაზე მიუთითებს, ხოლო გვარამიას, პატიმრობიდან გათავისუფლება ერთ-ერთი ნაბიჯი იქნება აღნიშნული რეკომენდაციის შესასრულებლად.
  • ხელმომწერ ორგანიზაციათა სრული სია შეგიძლიათ იხილოთ ბმულზე.