მეშვიდეკლასელ მოსწავლეს, რომელმაც მძღოლის მიერ გონების დაკარგვის შემდეგ ავტობუსი უსაფრთხოდ გააჩერა, სკოლის გმირს ეძახიან. მეშვიდეკლასელი დილონ რივზი სკოლის ავტობუსით თანაკლასელებთან და მასწავლებლებთან ერთად მგზავრობდა, როცა მძღოლი ცუდად გახდა. რივზი რთულ სიტუაციაში არ დაიბნა და ავტობუსის ყველა მგზავრის გადარჩენა შეძლო.

როგორც მძღოლი იხსენებს, ავტობუსის მართვის დროს თავბრუსხვევა დაეწყო. პროტოკოლის მიხედვით, მან ამის შესახებ სკოლას აცნობა და სხვა მძღოლის გამოგზავნა მოითხოვა, თავად კი ავტობუსის გაჩერებას აპირებდა. თუმცა სანამ ტრანსპორტის უსაფრთხოდ გაჩერებას შეძლებდა, მძღოლს თავბრუსხვევა გაუძლიერდა და ბოლოს გონებაც დაკარგა. ამ დროს კი ავტობუსი შუა გზაზე იყო და მოძრაობას აგრძელებდა.

ფოტო: Carter Middle School

რივზი ავტობუსის მძღოლისგან მოშორებით, დაახლოებით მე-5 რიგში იჯდა. როგორც მგზავრები ჰყვებიან, ის ადგილიდან წამოხტა, ზურგჩანთა დააგდო, საჭესთან მიირბინა და ავტობუსი შუა ხაზზე გააჩერა. ამ დროს სხვა მგზავრები დაბნეულები იყვნენ, რივზი კი ყვიროდა, რომ ვინმეს 911-ზე დაერეკა.

ავტობუსის 66 მგზავრი რივზის გმირობამ გადაარჩინა. მან ავტობუსიც უსაფრთხოდ გააჩერა, ხოლო გონებადაკარგულ მძღოლს დახმარება მალევე აღმოუჩინეს. ავტობუსის მგზავრები კი სხვადასხვა ტრანსპორტით სახლში უსაფრთხოდ მიიყვანეს.

"ის ჩვენი პატარა გმირია და მისით ძალიან ვამაყობთ. ეს ყველაფერი ჩვენთვისაც მოულოდნელი იყო. რივზი მართლაც შესანიშნავი ბიჭია, მან საკმაოდ რთული გზა გაიარა, წელს კი სკოლის შეფასებებთან ერთად გმირობითაც გაგვაოცა", — ამბობენ მეშვიდეკლასელი ბიჭის მშობლები.