რატომ არის მნიშვნელოვანი: აქონდროპლაზიის დიაგნოზის მქონე ბავშვების მშობლები უკვე მე-6 დღეა კანცელარიასთან ათენებენ და პროტესტს აგრძელებენ.

  • ისინი წელიწადზე მეტია, უშედეგოდ ითხოვენ მათი შვილებისთვის სასიცოცხლოდ მნიშვნელოვანი წამლის შემოტანას, რომლის წლიური დოზაც, დაახლოებით, 200 000 დოლარი ჯდება.
  • ვოსორიტიდს აშშ-ის წამლისა და საკვების ადმინისტრაციისა (FDA) და ევროპის წამლის სააგენტოს (EMA) ავტორიზაცია 2021 წელს მიენიჭა — ის აქონდროპლაზიის სამკურნალო პირველი პრეპარატია.
  • მშობლების შეხვედრა ჯანდაცვის მინისტრთან უშედეგო აღმოჩნდა.

დეტალები: სახალხო დამცველის აპარატის წარმომადგენელი ამბობს, რომ ომბუდსმენს, ლევან იოსელიანს არ ეცალა, ამიტომ მშობლებთან შესახვედრად ის მივიდა.

  • მისი თქმით, არ აქვთ ბერკეტი, პირდაპირ მოითხოვონ რამის გაკეთება და მხოლოდ მედიაციის ფუნქციის შესრულება შეუძლიათ, რათა საკითხის განხილვა დაჩქარდეს.
  • ლიკა წიკლაურის განცხადებით, კომუნიკაციაში არიან როგორც სამინისტროს წარმომადგენლებთან, ასევე, მშობლებთან.
  • "არ არის სამინისტროს მხრიდან დახურული და ვიმედოვნებთ, რომ ბავშვების ინტერესების შესაბამისად იქნება გადაწყვეტილი", — ამბობს ის.