სურსათის ეროვნულმა სააგენტომ, შემოსავლების სამსახურთან ერთობლივი ოპერაციით, უნებართვოდ დაკლული და ჯანმრთელობისთვის საფრთხის შემცველი ხორცის ბაზარზე მოხვედრა აღკვეთა. სპეციალისტებმა ამოიღეს და სრულად გაანადგურეს 2 ტონამდე უვარგისი პროდუქცია. ინფორმაციას სეს ავრცელებს.

მათი ცნობით, სააგენტოში მცხეთა-მთიანეთში, სოფელ წილკანში 15 სული მსხვილფეხა პირუტყვის ინტოქსიკაციის შესახებ შეტყობინება შევიდა. სადგომის მწერების საწინააღმდეგო პრეპარატით არასწორი დამუშავების გამო საქონელი მოიწამლა. ვეტერინარების მიერ ადგილზე უკვე დაკლული ერთი პირუტყვი განადგურდა, ხოლო დანარჩენ 14 სულზე ფერმერს სააგენტოს წინასწარი ინფორმირების ვალდებულება დაეკისრა.

მიუხედავად ამისა, დამატებითი მოკვლევით იმერეთში გამოვლინდა სატრანსპორტო საშუალება, რომელსაც სასაკლაოს გვერდის ავლითა და ვეტერინარული ზედამხედველობის გარეშე დაკლული 2 ტონამდე ხორცი გადაჰქონდა. შემოწმებით დადასტურდა, რომ საყურე ნიშნები სწორედ წილკანში მოწამლულ საქონელს ეკუთვნოდა. სააგენტომ ხორცი სრულად ამოიღო და გაანადგურა, ხოლო ბიზნესოპერატორი კანონის შესაბამისად დააჯარიმა.

"სურსათის ეროვნულმა სააგენტომ, ფინანსთა სამინისტროს შემოსავლების სამსახურთან თანამშრომლობით, ჯანმრთელობისთვის საფრთხის შემცველი, უნებართვოდ დაკლული მსხვილფეხა პირუტყვის ხორცის რეალიზაციის ფაქტი აღკვეთა. ერთობლივი ღონისძიების შედეგად, ამოღებულია და განადგურებულია 2 ტონამდე ხორცი.

თავდაპირველად, სააგენტოში მცხეთა-მთიანეთის რეგიონის სოფელ წილკანიდან შემოვიდა შეტყობინება 15 სული მსხვილფეხა პირუტყვის ინტოქსიკაციის შესახებ. ფერმერის (კ. წ.) ინფორმაციით, საქონლის სადგომის მწერების საწინააღმდეგო პრეპარატით დამუშავების შემდეგ, ცხოველებს მოწამვლის ნიშნები აღენიშნათ.

სააგენტოს მცხეთა-მთიანეთის დეპარტამენტის ვეტერინარებმა დაუყოვნებლივ მოახდინეს რეაგირება და ლაბორატორიული კვლევისთვის აიღეს გამოყენებული პრეპარატის ნიმუში (პირველადი შესწავლით, ადგილი ჰქონდა პრეპარატის არასწორ გამოყენებასა და უსაფრთხოების წესების დარღვევას). ადგილზე არსებული, ფერმერის მიერ უკვე დაკლული ერთი სული პირუტყვი ვეტერინარული წესების დაცვით განადგურდა, ხოლო დარჩენილ 14 სულთან დაკავშირებით, ჯანმრთელობისთვის საშიში ხორცის ბაზარზე მოხვედრის თავიდან აცილების მიზნით, ფერმერს სააგენტოს წინასწარი ინფორმირების ვალდებულება დაეკისრა.

ჩატარებული დამატებითი მოკვლევის შედეგად, შემოსავლების სამსახურისა და სააგენტოს იმერეთის დეპარტამენტის ინსპექტორებმა ერთობლივი ღონისძიების ფარგლებში გამოავლინეს სატრანსპორტო საშუალება, რომელსაც შპს "პროდუქტები 2028"-ის (ს/კ 445530239) კუთვნილი, სასაკლაოს გვერდის ავლითა და ვეტერინარული ზედამხედველობის გარეშე დაკლული 2 ტონამდე ხორცი გადაჰქონდა.

შემოწმებით დადგინდა, რომ ცხოველების საიდენტიფიკაციო საყურე ნიშნები სწორედ სოფელ წილკანში სავარაუდოდ მოწამლულ პირუტყვს ეკუთვნოდა.

სააგენტოს ინსპექტორებმა კანონმდებლობით გათვალისწინებული ღონისძიებები გაატარეს - ხორცი სრულად ამოიღეს და გაანადგურეს, ხოლო ბიზნესოპერატორი დაჯარიმდა", — აღნიშნულია სეს-ის განცხადებაში.