დიდ ბრიტანეთში უკრაინის ელჩმა, ვალერი ზალუჟნიმ განაცხადა, რომ მას არ სჯერა უკრაინის NATO-ში ოდესმე გაწევრიანების. მისი შეფასებით, ქვეყანამ ყურადღება უსაფრთხოების სხვა სამხედრო ალიანსების განვითარებაზე უნდა გადაიტანოს. ინფორმაციას უკრაინული მედია ავრცელებს.

კიევში გამართულ ელჩების შეხვედრაზე, ევროატლანტიკური ინტეგრაციის შესახებ დისკუსიისას, ზალუჟნიმ ჩრდილოატლანტიკური ალიანსის ამჟამინდელი შესაძლებლობები მკვეთრად გააკრიტიკა. მიუხედავად იმისა, რომ მას კითხვა გაერთიანებულ ექსპედიციურ ძალებში (JEF) უკრაინის ჩართულობაზე დაუსვეს, მან გამოსვლა ნატოს შეფასებით დაიწყო.

"მე ძალიან კარგად ვიცნობ NATO-ს. დაახლოებით 12 წლის განმავლობაში პირადად ვმუშაობდი იმისთვის, რომ NATO-ს სტანდარტები დაგენერგა და ყოველწლიურად ვისმენდი ზღაპრებს იმის შესახებ, რომ თითქოს NATO-ში გაწევრიანების ზღვარზე ვიყავით. სამწუხაროდ, ჩვენ იქ ვერასდროს გაწევრიანდებით!" — განაცხადა ზალუჟნიმ.

ზალუჟნის განმარტებით, გაწევრიანების ერთ-ერთი მთავარი დაბრკოლება ის არის, რომ უკრაინის შეიარაღებული ძალების დღევანდელი შესაძლებლობების ფონზე შეუძლებელია იმ ორგანიზაციაში გაწევრიანება, რომელიც მეორე მსოფლიო ომის დოქტრინებით ხელმძღვანელობს. მან ხაზი გაუსვა, რომ ალიანსს თავისი სტანდარტების დასახვეწად შესაძლოა კიდევ წლები დასჭირდეს.

"დიდი ალბათობით, NATO დარჩება თავის ამჟამინდელ ფორმაში და ზუსტად ისევე დახარჯავს კიდევ 12 წელს, როგორც უკრაინამ დახარჯა, იმ სტანდარტებზე გადასასვლელად, რაც რუსეთის ფედერაციის დონის ნახევრამდე მისაღწევადაც კი არის საჭირო", — აღნიშნა ელჩმა.

ამასთან, ზალუჟნიმ აღიარა, რომ უკრაინას ჰაერსაწინააღმდეგო, კოსმოსურ და სხვა მაღალტექნოლოგიურ სფეროებში NATO-ს ქვეყნების ტექნოლოგიები მაინც სჭირდება. მომავალ უსაფრთხოების გარანტიებზე მსჯელობისას მან აღნიშნა, რომ უკრაინა, სავარაუდოდ, ახლად ჩამოყალიბებულ ევროპულ სამხედრო უსაფრთხოების ბლოკს დაუკავშირდება.

დიპლომატმა ასევე ისაუბრა გაერთიანებულ ექსპედიციურ ძალებზეც (JEF) და სინანული გამოთქვა, რომ უკრაინა ამ გაერთიანებაში გაწევრიანებაზე აქტიურად არ მუშაობს:

"JEF-ს 2015 წლიდან აქვს მართვისა და კონტროლის სტრუქტურები. მართალია, ისინი ჯერ კიდევ სუსტია და არ არიან იმ დონეზე, რაც ჩვენ გვჭირდება", — განაცხადა მან.

ცნობისთვის, JEF-ის 10-მა წევრმა ქვეყანამ უკვე მოაწერა ხელი განზრახვათა ოქმს მრავალეროვნული საზღვაო ძალების შექმნაზე, რომელიც NATO-ს დამატებითი კომპონენტი იქნება. უკრაინა JEF-თან გაფართოებული პარტნიორობის შეთანხმებას უკვე შეუერთდა, თუმცა აღნიშნული გაერთიანება ამჟამად კოლექტიური თავდაცვის სავალდებულო მექანიზმებს არ ითვალისწინებს.