რა მოხდა: 20 აპრილს რუსეთის ქალაქ ბელგოროდში აფეთქება იყო. თავიდანვე ეჭვი უკრაინის შეტევაზე ან პარტიზანულ ბრძოლაზე გაჩნდა, თუმცა მოგვიანებით რუსეთის თავდაცვის სამინისტრო საკუთარ ბრალეულობაზე ალაპარაკდა.

  • ოკუპანტი ქვეყნის უწყებამ განაცხადა, რომ მათი საჰაერო-კოსმოსური ძალების თვითმფრინავის, Су-34-ის მიერ საჰაერო საბრძოლო მასალის "არასაშტატო გაშვება მოხდა" — მარტივად რომ ვთქვათ, ბომბი ჩამოუვარდათ.

რატომ არის მნიშვნელოვანი: დღეს რუსულმა ტელეგრამ არხებმა დაწერეს, რომ ეკიპაჟმა მაშინვე განახადა ორი ბომბის ჩამოვარდნის შესახებ, თუმცა, აქამდე უცნობი იყო, რა დაემართა მეორეს.

  • ასევე გავრცელდა ინფორმაცია "შემთხვევით ჩამოგდებული" ბომბის აფეთქების ადგილთან "ფეთქებადსაშიში ნივთის" აღმოჩენის შესახებ.

  • ტელეგრამ არხი ბაზა ამტკიცებდა, რომ ბომბი, რომლის ამოღებასაც ბელგოროდში ცდილობნენ, პირველად მაღალსართულიან შენობას დაეცა და სამი სართულის აივნები დაანგრია.

  • ბელგოროდში საგანგებო მდგომარეობა და ევაკუაცია გამოცხადდა, როგორც რეგიონის გუბერნატორმა, ვიაჩესლავ გლადკოვმა განაცხადა, 17 კორპუსის მაცხოვრებლების ევაკუაცია მოხდა.

დეტალები: ბაზას ცნობით, ბომბი ამოიღეს, თუმცა ბელგოროდის ხელისუფლებას ამის შესახებ კომენტარი არ გაუკეთებია.

  • გარდა ამისა, ბელგოროდის სოციალურ ქსელებში გავრცელდა ვიდეო, როგორ დებენ ნაპოვნ ბომბს სატვირთო მანქანაში.
  • ტელეგრამის არხმა Shot-მა ასევე გამოაქვეყნა ვიდეო, როგორ გადააქვთ საბრძოლო მასალა სამხედრო ბაზაზე.
  • ამავდროულად, გუბერნატორმა განაცხადა, რომ ბელგოროდის სოფლის, ნოვაია ტავოლჟანკა უკრაინის შეიარაღებული ძალების ცეცხლის ქვეშ მოექცა.