რამდენიმესაათიანი დაძაბულობისა და ხმაურის შემდეგ, ბერი ნიკოლოზ მაქარაშვილი, რომელსაც მღვდელმსახურება წლებია შეჩერებული აქვს, მეპატრონემ ნაქირავებ ბინაში შეუშვა.

მაქარაშვილის ნაქირავებში შეშვებას მისი მიმდევრები ითხოვდნენ, რამდენიმე მათგანი სახლის სახურავზეც აძვრა პროტესტის ნიშნად.

ადგილზე ათეულობით პოლიციელი ცდილობდა ვითარების განმუხტვას. საბოლოოდ, საქმეში საკრებულოსა და პარლამენტის დეპუტატებიც ჩაერთნენ, რის შემდეგაც მეპატრონემ, კახა ხელაძემ, მაქარაშვილს სახლში შესვლის უფლება მისცა.

როგორც ხელაძემ მედიასაშუალებებს განუცხადა, მაქარაშვილის სახლში არშეშვების მიზეზი მისი მხრიდან აგრესიული ქმედებები გახდა, თუმცა რადგან სიტუაცია უკიდურესად დაიძაბა გვიან ღამით, მან განმუხტვის მიზნით გადაწყვიტა მისი სახლში შეშვება. მან იმედი გამოთქვა, რომ სახელმწიფო სტრუქტურები მომავალში მაინც მოაგვარებენ ამ პრობლემას.

ადგილზე იმყოფებოდა პარლამენტარი ლევან გოგიჩაიშვილიც, რომელმაც თქვა:

"დიდი საფრთხის წინაშე ვიდექით და მადლობა ღმერთს, ეს ყველაფერი განეიტრალდა, დამშვიდდა სიტუაცია. სახელმწიფო ყველაფერს გააკეთებს როგორც ამ ოჯახის უსაფრთხოებისთვის, ასევე კანონიერი ინტერესების დაცვისთვის".

საზოგადოებრივი მაუწყებელი საპატრიარქოზე დაყრდნობით წერს, რომ ნიკოლოზ მაქარაშვილს ჯანმრთელობასთან დაკავშირებული პრობლემების გამო, მღვდელმსახურება წლების წინ შეუწყდა.

განახლება: სტატიაში თავდაპირველად ეწერა "ნიკოლოზ მაქარაშვილი, რომელიც საკუთარ თავს ბერს უწოდებს". აღნიშნულის დაწერისას On.ge დაეყრდნო საპატრიარქოს განცხადებას, რომლის მიხედვითაც, მაქარაშვილს შეწყვეტილი აქვს მღვდელმსახურება. On.ge-მ გაარკვია, რომ ბერობისთვის საკმარისია ფიცის დადება და მისი შეჩერების მექანიზმი არ არსებობს. თუ პირი თავს მიიჩნევს ბერად, ის არის ბერი, მიუხედავად იმისა, ასრულებს თუ არა ის მღვდელმსახურებას.