ტოლერანტობისა და მრავალფეროვნების ინსტიტუტში მიიჩნევენ, რომ კონსტიტუციის პროექტით, შესაძლოა, რწმენისა და სინდისის თავისუფლება შეიზღუდოს, თუ მათი გამოვლინებები ლახავს სხვათა უფლებებს. მსგავსი შინაარსის განცხადება ორგანიზაციამ 20 ივნისს გაავრცელა.

"წარმოდგენილი ცვლილებების თანახმად, მართლმადიდებელი ეკლესიის განსაკუთრებული როლი კვლავ დეკლარირებულია, თუმცა, მოქმედი დებულებისგან განსხვავებით, ის რწმენისა და თავისუფლებასთან ერთად, ერთ კონტექსტშია განხილული და თანაზომად სიკეთედ არის წარმოდგენილი," - აღნიშნავენ ტოლერანტობისა და მრავალფეროვნების ინსტიტუტში.

ორგანიზაციაში მიაჩნიათ, რომ:

  • კონსტიტუციის ცვლილებათა პროექტის თანახმად, შესუსტდა ჩანაწერი რწმენის და აღმსარებლობის თავისუფლების შესახებ;
  • გაძლიერდა დომინანტი რელიგიური ჯგუფის პრივილეგირებული პოზიცია;
  • გაჩნდა რელიგიის თავისუფლებისა და სეკულარობის დაცვის სტანდარტების გაუარესების რისკები.


ტოლერანტობისა და მრავალფეროვნების ინსტიტუტი საქართველოს პარლამენტს მოუწოდებს, გაითვალისწინოს ვენეციის კომისიის, საქართველოს სახალხო დამცველისა და არასამთავრობო ორგანიზაციების მოსაზრებები კონსტიტუციის ცვლილებებთან დაკავშირებით და არ დაუშვას რელიგიის თავისუფლების დაცვის სტანდარტის გაუარესება და სეკულარობის პრინციპის დარღვევა.