50 წლის ესპანელმა ქალმა ცოტა ხნის წინ გამოქვაბული დატოვა, რომელშიც 500 დღე ცხოვრობდა. ბეატრის ფლამინმა 70 მეტრის სიღრმის გამოქვაბულში ცხოვრება 2021 წლის 20 ნოემბერს დაიწყო. მას ადამიანებთან და გარე სამყაროსთან კონტაქტი არ ჰქონდა და მსოფლიოში მიმდინარე მოვლენების შესახებაც არაფერი იცოდა.

ბეატრისმა გამოქვაბულში ცხოვრება სამეცნიერო ექსპერიმენტის ფარგლებში გადაწყვიტა. ექსპერიმენტის მიზანი სოციალური იზოლაციისა და გამოქვაბულში ცხოვრების პერიოდში ბეატრისის მიერ დროის აღქმაზე დაკვირვება იყო. მეცნიერთა ჯგუფის განცხადებით, ბეატრისმა გამოქვაბულში გატარებული დროით ექსპერიმენტის სხვა მონაწილეებს გადაასწრო და რეკორდი დაამყარა.

ფოტო: Reuters

"როცა ჩემს გამოსაყვანად მოვიდნენ, მეძინა. ვიფიქრე, რომ რაღაც მოხდა. მათ ვუთხარი: "უკვე დროა? რა თქმა უნდა, არა". მე ხომ წიგნის წაკითხვაც კი არ მქონდა დასრულებული", — ამბობს რეკორდსმენი.

ბეატრისი 48 წლის იყო, როცა გამოქვაბულში ცხოვრება დაიწყო და იქ 2 დაბადების დღე აღნიშნა. მართალია, 500 დღის განმავლობაში ბეატრისს ადამიანებთან კონტაქტი არ ჰქონია, თუმცა ექიმები ვიდეოკამერებით მის ჯანმრთელობას ყოველდღიურად აკვირდებოდნენ. ექსპერიმენტის ფარგლებში, გამოქვაბულში ცხოვრების მაქსიმალური ხანგრძლივობა 269 დღე იყო, თუმცა ბეატრისმა იზოლაციაში ცხოვრება გაცილებით დიდხანს შეძლო.