რატომ არის მნიშვნელოვანი: რუსული პროპაგანდა მუდმივად აპელირებს მართლმადიდებლობაზე და ცდილობს წარმოაჩინოს, თითქოს საქართველოსა და უკრაინასთან საერთო ღირებულებები აქვს.

  • თუმცა რუსეთი არასდროს ხელმძღვანელობს რელიგიური პრინციპებით, ანადგურებს და ანადგურებდა ეკლესიებსა და სიწმინდეებს, როგორც ჩვენთან, ასევე უკრაინაში.
  • რუსული ეკლესია კი კრემლის პროპაგანდის მნიშვნელოვანი იარაღია და მხარს უჭერს ომს უკრაინაში.
  • ოკუპანტი ქვეყანა არც საეკლესიო დღესასწაულების დროს ერიდება უკრაინის ქალაქების დაბომბვას.

დეტალები: ნიკოლაევის ოლქის სამხედრო ადმინისტრაციის ხელმძღვანელის, ვიტალი კიმის განცხადებით, 16 აპრილის ღამეს, სნიგირევსკას თემი S-300 რაკეტებით დაბომბეს.

  • ერთ-ერთ დასახლებაში ჭურვის ჩამოვარდის შედეგად 2005 წელს დაბადებული ორი მოზარდი დაიღუპა.
  • დაზიანდა საცხოვრებელი კორპუსები, სასწავლო დაწესებულება და კერძო საწარმო.
  • გარდა ამისა, ღამით ოკუპანტებმა მასიური შეტევა განახორციელეს ზაპოროჟიეს რაიონზე.
  • სამხედრო ადმინისტრაციის ხელმძღვანელმა აღნიშნა, რომ დაზიანდა კამიშევახის ადგილობრივი ეკლესია, რომელშიც ღვთისმსახურება არ აღესრულებოდა, განადგურდა ახლომდებარე შენობებიც.
  • რუსებმა ჩერნიგოვის რაიონში საწარმოც დაბომბეს, სადაც ხანძარი გაჩნდა.
  • გენერალური შტაბი აცხადებს, რომ ბოლო 24 სათში მოიგერიეს მტრის 60 თავდასხმა და ჩამოაგდეს რუსული სუ-25 თვითმფრინავი.