ამის შესახებ ორგანიზაცია განცხადებას ავრცელებს.

რატომ არის მნიშვნელოვანი: 6 თებერვალს პარლამენტის თავმჯდომარის ბრძანებით, მედიას ახალი შეზღუდვები დაუწესდა.

  • ჟურნალისტებსა და ოპერატორებს კონკრეტული ქცევის წესების დაცვა ევალებათ.
  • სწორედ მათ დარღვევას ედავება პარლამენტი TV პირველის ჟურნალისტს, რუსუდან დუმბაძესა და ოპერატორ ირაკლი მურმანიშვილს, მთავარი არხის ჟურნალისტს, თათია წოწონავასა და ოპერატორ ზუკა ჩხვირკიას, ასევე — ფორმულას ჟურნალისტს, სოფიო გოზალაშვილს — მათ აკრედიტაცია შეუჩერდათ.
  • გადაწყვეტილება უკავშირდება აშშ-ის მიერ სანქცირებულ მოსამართლეებსა და პროსამთავრობო მედია POST TV-ის ერთ-ერთ დამფუძნებელზე, სექსუალურ შევიწროებაში მხილებულ შალვა რამიშვილზე მომზადებულ სიუჟეტებს.

დეტალები: კოალიციის განცხადებით, პარლამენტის გადაწყვეტილება სადამსჯელო ხასიათს ატარებს.

  • "განსაკუთრებით, ქართული ოცნების მხრიდან კრიტიკული მედიის მიმართ გაცხადებული ბოიკოტისა და პოლარიზებული მედიაგარემოს ფონზე".
  • მათივე თქმით, ხელისუფლება საზოგადოებას განსხვავებული მოსაზრებებისა და პოზიციის მოსმენის შესაძლებლობას ართმევს.
  • "ქვეყანაში მედიაგარემო უკიდურესად მძიმე მდგომარეობაშია. კრიტიკული მედია პოლიტიკურად მოტივირებული საქმეების, ფიზიკური თავდასხმის, მუქარის, დეზინფორმაციისა თუ უკანონო მოსმენის სამიზნეა", — ვკითხულობთ განცხადებაში.

კოალიცია მოუწოდებს პარლამენტს, სასწრაფოდ აღუდგინოს ტელეკომპანიების თანამშრომლებს აკრედიტაცია.

  • "შეწყვიტოს ამ ფორმით კრიტიკულ მედიაზე დამატებითი ზეწოლის ახალი, მანკიერი პრაქტიკის დამკვიდრება".

ორგანიზაციის შეფასებით, პარლამენტის მიერ შემოღებული წესები ჟურნალისტებისათვის საფრთხის შემცველია და შესაძლოა, კრიტიკული კითხვების შეზღუდვისა თუ სარედაქციო პოლიტიკაზე წნეხისთვის იყოს გამოყენებული.

  • "ჩვენი შეშფოთება დადასტურდა კიდეც როგორც პარლამენტის ზემოაღნიშნული გადაწყვეტილებების დროს, ასევე, რუსული კანონის განხილვისას, როდესაც მედიას ხელისუფლებამ საკანონმდებლო ორგანოში პროფესიული საქმიანობის განხორციელებისა თუ კონსტიტუციით გარანტირებული უფლებები უკანონოდ შეუზღუდა, მათ შორის, აკრედიტაციის შეჩერებით", — ნათქვამია კოალიციის განცხადებაში.