Netflix-ის მძაფრსიუჟეტიანი ფილმის, Extraction 2-ის ახალი ტრეილერი გამოვიდა, რომელშიც მთავარი როლის შემსრულებელ კრის ჰემსვორტთან ერთად ქართველ მსახიობებსაც ვხედავთ. Extraction 2-ში თინათინ დალაქიშვილი, თორნიკე გოგრიჭიანი და დათო ბახტაძე მონაწილეობენ და თუკი პერსონაჟების სახელებს გავითვალისწინებთ, ისინი სწორედ ქართველ გმირებს ასახიერებენ.

გარდა ამისა, ფილმში ქართველი მკლავჭიდელი ლევან საგინაშვილიც იღებს მონაწილეობას, რის შესახებაც მან ჯერ კიდევ 2021 წლის ინტერვიუში განაცხადა. ფილმში ასევე ვიხილავთ თორნიკე ბზიავას, ანდრო ჯაფარიძესა და სხვებს.

Extraction 2-ის დიდი ნაწილი პრაღაში გადაიღეს. მართალია, თავიდან გადაღებები ავსტრალიაში იგეგმებოდა, თუმცა Covid-19-ის პანდემიის გამო გეგმები შეიცვალა. ფილმის მეორე ნაწილში კრის ჰემსვორტის პერსონაჟი ცდილობს, ქართველი განგსტერებისგან ოჯახი დაიხსნას, რომელიც ციხეში ჰყავთ დატყვევებული. რამდენად წარმატებით გაართმევს თავს კრისის პერსონაჟი ამ მისიას, ამას 2023 წლის ივნისში გავიგებთ, როცა ფილმის პრემიერა შედგება.

ფოტო: Netflix

რაც შეეხება Extraction-ის პირველ ფილმს, ის 2020 წელს გამოვიდა და 99 მილიონზე მეტი ნახვით ნეტფლიქსის ყველაზე ყურებადი ორიგინალური ნამუშევარი გახდა. ენდი პარკსის გრაფიკულ რომანზე დაფუძნებულ კინოსურათში, რომლის რეჟისორიც სემ ჰარგრეივია, მთავარ როლს კრის ჰემსვორტი ასრულებს.