დეტალები: ადვოკატმა ჟურნალისტებთან დაკავებულის მონახულების შემდეგ ისაუბრა.

  • "ციხის პირობებში, პენიტენციურის პირობებში არის ნორმალურ პირობებში, როგორც თვითონ განმარტა, მაგრამ ერთადერთი შენიშვნა ჰქონდა იმასთან დაკავშირებით, რომ მე არ მინდოდა გადაპარსვა და გადამპარსეს თმაო".
  • გარდა ამისა, ადვოკატი აცხადებს, რომ ლაზარე გრიგორიადის უფლებები ცალსახად დაირღვა — "იგი ითხოვდა ადვოკატს და არ მოუყვანეს".
  • ამბობს, რომ ემუქრებოდნენ, რომ თუ აღიარებით ჩვენებას არ მისცემდა, მის მეგობარს დააკავებდნენ.
  • ადვოკატის თქმით, გრიგორიადისი ამ დრომდე ინარჩუნებს დუმილის უფლებას და ჩვენებას პირველივე სასამართლო პროცესზე მისცემს.

რატომ არის მნიშვნელოვანი: რუსული კანონის საწინააღმდეგო აქციის მონაწილე, 21 წლის აქტივისტი პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ "ჩანს, ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
  • სახალხო დამცველის, ლევან იოსელიანის თქმით, საკუთარი მანდატის ფარგლებში ომბუდსმენის აპარატი აკეთებს ყველაფერს, რათა გრიგორიადისის უფლებები იყოს უზრუნველყოფილი.
  • კობახიძეზე დასმული კითხვის პასუხად, თქვა, რომ ნებისმიერი განცხადება, ორიენტაციაზე, მიუღებელია.