ლევან იოსელიანმა ადამიანის უფლებათა და თავისუფლებათა დაცვის მდგომარეობაზე 2022 წლის ანგარიში წარადგინა.

რატომ არის მნიშვნელოვანი: დოკუმენტში საუბარია ადამიანის უფლებების დაცვის მიმართულებით არსებულ გამოწვევებსა და გაცემული რეკომენდაციების შესრულების მდგომარეობაზე.

  • ეს არის ბოლო წლიური ანგარიში, რომელზეც ყოფილა სახალხო დამცველმა, ნინო ლომჯარიამ და მისმა მოადგილეებმა, გიორგი ბურჯანაძემ და ეკატერინე მსხილაძემ, იმუშავეს — მათ პოსტი რამდენიმე დღის წინ დატოვეს.
  • ბურჯანაძემ დაწერა, რომ აპარატიდან წასვლის მიზეზებზე არ ისაუბრებს, თუმცა მისივე თქმით, ასეთი ფაქტორი უამრავია.

დეტალები: სახალხო დამცველი ამბობს, რომ არაერთი გამოძიების პროცესში გამოვლინდა მნიშვნელოვანი ხარვეზები, რომლებიც ეფექტიანი გამოძიების კრიტერიუმებს არ შეესაბამება ან სამართლიანი სასამართლოს უფლებას არღვევს.

  • "მაგალითად, აშკარა პოლიტიკური ელფერი ჰქონდა ნიკა გვარამიას და ასევე, ე.წ. კარტოგრაფების საქმეზე მიმდინარე გამოძიებას", — ნათქვამია ანგარიშში.
  • ომბუდსმენი სამართალდამცავი ორგანოს ინსტიტუციური მოწყობისა და ანგარიშვალდებულების გასაუმჯობესებლად პარლამენტს გენერალური პროკურატურის რეფორმის დაწყებისკენ მოუწოდებს.