ამის შესახებ ყოფილმა თავდაცვის მინისტრმა და ტელეკომპანია ფორმულას ერთ-ერთმა დამფუძნებელმა გიორგი თარგამაძის დროებაში ისაუბრა.

რატომ არის მნიშვნელოვანი: 2021 წლის 7 სექტემბერს უზენაესმა სასამართლომ სისხლის სამართლის საქმეზე ყოფილ მაღალჩინოსანსა და ტელეკომპანია ფორმულას დამფუძნებლს, დავით კეზერაშვილს 5-წლიანი პატიმრობა მიუსაჯა. პროკურატურა მას საწვრთნელ პროექტში 5 მილიონზე მეტი თანხის გაფლანგვას ედავებოდა.

• ამავე წლის 30 სექტემბერს თავდაცვის ყოფილ მინისტრსა და შესყიდვების დეპარტამენტის ყოფილ უფროსს, ალექსანდრე ნინუას პროკურატურის მიერ სამსახურებრივი უფლებამოსილების ბოროტად გამოყენებისა და სახელმწიფოს დიდი ოდენობით ფულადი თანხების მითვისება/გაფლანგვის ფაქტზე წარედგინათ ბრალი.
• საქმე ეხებოდა ოფშორულ ზონაში რეგისტრირებული კომპანია GIRWOOD BUSINESS CORP-ის სასარგებლოდ გარკვეული მომსახურების გაწევის მიზნით დიდი ოდენობით თანხის გადარიცხვას. უწყების თქმით, ეს მომსახურება არ მიუღიათ.
• 2022 წლის 29 მარტს საქალაქო სასამართლომ სრულად დააკმაყოფილა თავდაცვის სამინისტროს სარჩელი და კეზერაშვილსა და ნინუას დაეკისრათ 5 060 000 ევროს ეკვივალენტი ლარის გადახდა სამინისტროს სასარგებლოდ.
• 21 მარტს სააპელაციომ კეზერაშვილის საქმეზე პირველი ინსტანციის გადაწყვეტილება ძალაში დატოვა.
• ფორმულა ამბობს, რომ სააპელაციოს გადაწყვეტილების მიზანი კრიტიკული მედიის შევიწროებაა.

დეტალები: კეზერაშვილი ფორმულასთან ამბობს, რომ მისი ერთ-ერთი მთავარი მიზანი მინისტრობის დროს იყო ის, რომ ისრაელთან ახლო ურთიერთობები დაელაგებინა და ასეც მოიქცა.

• "ჩემი პირველი ვიზიტი იყო ისრაელში, ჩავედი, შევხვდი ჩემს კოლეგებს და ძალიან ბევრი რამ ავაწყეთ. ამას ახლა ვერ მოვყვები, არც შეიძლება, რომ მოვყვე. მაგრამ მათ შორის ერთ-ერთი იყო წვრთნის ეს პროგრამა, რომელზეც ახლა მედავებიან და ამბობენ, რომ თურმე ეს არ მომხდარა", — თქვა კეზერაშვილმა.
• მისი განმარტებით, წვრთნები საქართველოში ჩატარდა და აქ იმყოფებოდა 200-მდე მაღალკვალიფიციური, სხვადასხვა რანგის ისრაელის ოფიცერი, იყო ლიცენზირებული საქმიანობა.
• "თუმცა შუაში, როცა ჩვენმა მოწინააღმდეგეებმა გაიგეს ამის შესახებ, ისინი რაღაც ხერხებით დაუკავშირდნენ ისრაელის მთავრობას და ჩვენ მივიღეთ თხოვნა, რომ უნდა შეგვეცვალა კონტრაქტი", — თქვა ყოფილმა მინისტრმა.
• განმარტა, რომ ბოლო ოფიცრები, რომლებიც წვრთნიდნენ საქართველოს შეიარაღებულ ძალებს, საქართველოს ტერიტორია ბათუმის გავლით, სარფის გავთლით — დატოვეს 10 აგვისტოს.
• "ეს არის დადასტურებული ფაქტები. ომის დაწყებიდან 2 დღეში. ისინი ბოლომდე ადგილზე იმყოფებოდნენ და ასრულებდნენ თავიანთ საქმეს", — თქვა მან.

დავით კეზერაშვილის განცხადებით, მას შემდეგ, რაც ის საქართველოდან წავიდა, ისრაელს მიმართეს თხოვნით, რომ იქაც დაწყებულიყო გამოძიება.

• "ეს გამოძიება, თუ არ ვცდები 2014 წელს დაიწყო და გრძელდებოდა რამდენიმე წელი. ისინი ვერსად ვერ მივიდნენ, ისრაელის გამოძიებამ დახურა საქმე, რადგან ნახეს, რომ ნამდვილად წვრთნები ჩატარდა, კონტრაქტები იყო, ფული არის გადახდილი, ყველაფერი არის წესრიგში და საქმე არის დახურული,მე მომისაჯეს ის რაც მომისაჯეს", — თქვა კეზერაშვილმა.
• ამბობს, რომ საქართველოს შეიარაღებული ძალების მშენებლობაში მნიშვნელოვანი წვლილი აქვს შეტანილი, ეს მხოლოდ უხარია და ამის შესახებ იცის ყველა ოფიცერმა, ვინც საქართველოში მსახურობდა — იმ პერიოდშიც და მას შემდეგაც.