საქართველოს პრეზიდენტი, გიორგი მარგველაშვილი, პარლამენტის თავმჯდომარეს, ირაკლი კობახიძეს, საკონსტიტუციო ცვლილებებზე ერთობლივ მსჯელობას სთავაზობს და მას პრეზიდენტის სასახლეში იწვევს.

აღნიშნული შეთავაზება საქართველოს პრეზიდენტის ადმინისტრაციის უფროსმა, გიორგი აბაშიშვილმა, პარლამენტის თავმჯდომარის ირაკლი კობახიძის განცხადების საპასუხოდ დღეს გააკეთა.

„პრეზიდენტი ყოველთვის მხარს უჭერდა საკონსტიტუციო რეფორმის პროცესში ფართო ჩართულობას და მის მაღალ ლეგიტიმაციას, შესაბამისად ვთავაზობთ, რომ აქ, პრეზიდენტის სასახლეში გაიმართოს შეხვედრა, რომელშიც მონაწილეობას მიიღებენ საქართველოს პრეზიდენტი, საქართველოს პარლამენტის თავმჯდომარე, საქართველოს პრემიერმინისტრი, სახალხო დამცველი, პოლიტიკური პარტიები, არასამთავრობო ორგანიზაციები, ექსპერტები, ბიზნესასოციაციები და ფართოდ გაშუქდეს მედიის მიერ, ის პრობლემური საკითხები, რომელიც ხელს გვიშლის მივაღწიოთ რეალურ კონსენსუსს“, - აღნიშნა პრეზიდენტის ადმინისტრაციის უფროსმა.

გიორგი აბაშიშვილის განცხადებით, ცვლილებების პროექტზე მსჯელობა საჭიროა იმისთვის, რომ, „სახელმწიფოებრივი დოკუმენტი მივიღოთ არა ერთპარტიულად, არამედ, ფართო კონსენსუსის საშუალებით“.