არა, არაფერი მოგჩვენებიათ — გრეი სლოუნის კლინიკაში კიდევ ერთი წლით დავრჩებით. ერთ-ერთი ყველაზე ხანგრძლივი სატელევიზიო სერიალი, გრეის ანატომია, მე-20 სეზონით გაგრძელდება. ABC-ის წარმატებული პროექტის ახალ სეზონს 2023-2024 წლებში ვიხილავთ.

ამასთან, ცნობილი გახდა, რომ გრეის ანატომიის მე-20 სეზონის შემქმნელი მეგ მარინისი იქნება. ამ პოზიციაზე იგი კრისტა ვერნოფს ჩაანაცვლებს, რომელიც სერიალის მე-19 სეზონს ხელმძღვანელობს. მარინისი გრეის ანატომიაზე მე-3 სეზონის შემდეგ მუშაობს, სხვადასხვა დროს იყო სცენარისტის თანაშემწე, სამედიცინო მკვლევარი და აღმასრულებელი პროდიუსერი. ასევე, იგი სერიალის 25-ზე მეტი ეპიზოდის სცენარის ავტორიც გახლავთ.

გრეის ანატომიის მე-20 სეზონში არც სერიალის მთავარი გმირის შემსრულებელს, ელენ პომპეოს, მოვისაკლისებთ — იმის მიუხედავად, რომ იგი სამსახიობო გუნდის მუდმივი წევრი აღარ იქნება, კვლავ რჩება ამბის მთხრობლად და აღმასრულებელ პროდიუსერად. სამაგიეროდ, შევხვდებით ახალ ინტერნებს.

ფოტო: ABC

ცნობილი ამერიკელი სცენარისტისა და პროდიუსერის, შონდა რაიმსის, მიერ შექმნილი გრეის ანატომია წლების შემდეგაც რჩება ერთ-ერთ ყველაზე ყურებად სატელევიზიო შოუდ და უდავოდ ყველაზე პოპულარულ სამედიცინო დრამად.

სერიალის პრემიერა 2005 წლის მარტში შედგა, ამჟამად კი მისი მე-19 სეზონი მიმდინარეობს. არსებობის განმავლობაში გრეის ანატომიამ, მილიონობით ერთგული მაყურებლის შეძენასთან ერთად, უამრავი ნომინაცია და ჯილდოც მიიღო — მათ შორის, ოქროს გლობუსი საუკეთესო სატელევიზიო შოუსთვის.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…