თბილისის საკრებულოს გენდერული საბჭოს ოპოზიციონერმა დეპუტატებმა დღეს ამ თემაზე ბრიფინგი გამართეს.

დეტალები: მათი განცხადებით, იმის გათვალისწინებით, რომ შალვა რამიშვილი ქართული ოცნების პროპაგანდისტული მედიის დამფუძნებელია, ხელისუფლების წარმომადგენლები, მათ შორის, საკრებულოს გენდერული საბჭო და მისი თავმჯდომარე დუმს.

  • მათივე განმარტებით, მიუხედავად მრავალი მოწოდებისა ამ დრომდე საბჭოს სხდომაც კი არ ჩანიშნულა ამ საკითხების განსახილველად.
  • დეპუტატები ამბობენ, რომ შემაშფოთებელია ხელისუფლების გარკვეული ნაწილის მოწოდებები და კომენტარები შალვა რამიშვილის დასაცავად და საერთო ოცნებისეული ნარატივი ქალების დასამცირებლად.
  • "კრიტიკულად მნიშვნელოვანია ახლა, როდესაც საქართველო ისტორიულ გზაგამყოფზეა და თან ევროკომისიის რეკომენდაციათაგან ერთ-ერთი სწორედ ქალთა მიმართ ძალადობის პრევენციას ეხება, თბილისის მუნიციპალიტეტის გენდერული თანასწორობის საბჭომ გადადგას ქმედითი ნაბიჯები, მოუწოდოს სამართალდამცავ ორგანოებს ობიექტური გამოძიებისკენ და ქალებს აღმოუჩინოს მხარდაჭერა და გამოუცხადოს სოლიდარობა", — განაცხადეს მათ.
  • თუ შესაბამისი ნაბიჯებს არ გადაიდგმება, ოპოზიცია გენდერული საბჭოს დატოვებას განიხილავს.
  • "კიდევ ერთხელ დავრწმუნდებით რომ საბჭო იმართება ქართული ოცნებისა და პოსტივის დირექტივებით და შესაბამისად, მთელი საბჭოს მუშაობა გახდება ფორმალური და ჩვენ არ გვსურს ამ ფორმალურ პროცესებში მონაწილეობა", — აცხადებენ ისინი.
  • აღნიშნავენ იმასაც, რომ პარლამენტის საბჭო და მისი თავმჯდომარე ნინო წილოსანი ისეთ განცხადებებს აკეთებს, რაც მიმართულია მსხვერპლი ქალების დაკნინებისა და შეურაცხყოფისკენ.

რატომ არის მნიშვნელოვანი: 20 მარტს ჟურნალისტმა, მაკო ჯაბუამ შალვა რამიშვილი სექსუალურ შევიწროებაში ამხილა.

  • ბოლო დღეებში კიდევ 7-მა ქალმა საჯაროდ დაწერა, რომ რამიშვილთან კომუნიკაციის არასასიამოვნო გამოცდილება ჰქონდათ, გასაუბრებაზე იღებდნენ სექსუალური შინაარსის კითხვებს და განიცდიდნენ დისკომფორტს.
  • ფორმულამ გაავრცელა ჩანაწერები, რომლებშიც ისმის, რომ რამიშვილი ანანია გაჩეჩილაძეს ეუბნება: "ტ*ნაურის დროს რომ გცემენ გევასება?", "არ გიყვარს როცა მამაშვილურად გეფერებიან?", "ნებისმიერი პირველი ღიმილი ნიშნავს კის, მომ**ანი".
  • ბრალდებების ფონზე ქართული ოცნების წევრებმა რამიშვილისადმი ირიბი მხარდაჭერა გამოხატეს, მის წინააღმდეგ გამოძიება კი ამ დრომდე არ დაწყებულა.
  • პარალელურად, სახელისუფლებო და პროპაგანდისტულმა POSTV-მ დაიწყო დისკრედიტაციის კამპანია თათია სამხარაძის წინააღმდეგ, რომელმაც წლების წინ რამიშვილს სექსუალური შევიწროების საქმე მოუგო.
  • ქალებს სოლიდარობა გამოუცხადეს პრეზიდენტმა, ოპოზიციონერმა ქალმა პოლიტიკოსებმა, არასამთავრობო და სამოქალაქო ორგანიზაციებმა და არაერთმა ცნობილმა სახემ.
  • ერთკვირიანი დუმილის შემდეგ სახალხო დამცველმაც განაცხადა, რომ თანადგომას უცხადებს "ძალადობის სავარაუდო მსხვერპლებს".

სექსუალური შევიწროება არის არასასურველი სექსუალური ხასიათის ქცევა, რომელიც მიზნად ისახავს ან იწვევს ღირსების შელახვას და ქმნის დამაშინებელ, მტრულ, დამამცირებელ ან შეურაცხმყოფელ გარემოს.

  • კანონის მიხედვით, სექსუალური ხასიათის ქცევად მიიჩნევა სექსუალური ხასიათის ფრაზების თქმა ან/და მიმართვა, გენიტალიების ჩვენება ან/და სექსუალური ხასიათის სხვა ნებისმიერი არასიტყვიერი ფიზიკური ქცევა.
  • იმ შემთხვევაში, თუ მიიჩნევთ, რომ სექსუალურად შეგავიწროვეს სამსახურში, უნდა მიმართოთ სასამართლოს ან სახალხო დამცველს, ხოლო თუ ეს მოხდა საჯარო სივრცეში — პოლიციას.

  • სექსუალური შევიწროება ადმინისტრაციულ სამართალდარღვევათა კოდექსით ისჯება და არ არის სისხლის სამართლის დანაშაული.

  • საზოგადოებრივ ადგილებში პირის მიმართ არასასურველი სექსუალური ხასიათის ქცევა ჯარიმდება 300 ლარით, ხოლო ადმინისტრაციული სახდელის დადებიდან 1 წლის განმავლობაში განმეორების შემთხვევაში — 500 ლარით, შესაძლებელია გამასწორებელი სამუშაოებიც ერთ თვემდე ვადით.

  • იგივე ქმედება არასრულწლოვანის, ორსულის, უმწეო მდგომარეობაში მყოფის, შეზღუდული შესაძლებლობების მქონე პირის მიმართ ან არასრულწლოვანის თანდასწრებით — გამოიწვევს დაჯარიმებას 500-დან 800 ლარამდე ოდენობით.

  • ერთი წლის განმავლობაში გამეორების შემთხვევაში გამოიწვევს 800-დან 1 000 ლარამდე ოდენობით ჯარიმას, ან გამასწორებელ სამუშაოებს ერთ თვემდე ვადით, ან ადმინისტრაციულ პატიმრობას 10 დღემდე ვადით.

გაიგეთ მეტი:

ამავე თემაზე: