რატომ არის მნიშვნელოვანი: 2023 წლის 20 მარტს ჟურნალისტმა, მაკო ჯაბუამ შალვა რამიშვილი სექსუალურ შევიწროებაში ამხილა.

• მომდევნო დღეებში არაერთმა ქალმა საჯაროდ დაწერა, რომ რამიშვილთან კომუნიკაციის არასასიამოვნო გამოცდილება ჰქონდათ, გასაუბრებაზე იღებდნენ სექსუალური შინაარსის კითხვებს და განიცდიდნენ დისკომფორტს.
• 22 მარტს On.ge-მ ომბუდსმენის ოფისში იკითხა, დაწყებული იყო თუ არა ამ საკითხების შესწავლა — გვითხრეს, რომ მიმართვის შემთხვევაში დაიწყებდნენ.
• ამ დღეების განმავლობაში სახალხო დამცველს არაერთხელ მოუწოდეს გამოხმაურებოდა როგორც სექსუალური შევიწროებაზე განცხადებებს, ასევე თათია სამხარაძის წინააღმდეგ POSTV-ის კამპანიას.
• 26 მარტს სახალხო დამცველის მოადგილემ, გიორგი ბურჯანაძემ დაწერა, რომ წარმოუდგენელია ამ უკანონობისა და სითავხედის მასშტაბი, რაც სამხარაძის წინააღმდეგ მიმდინარეობს და ყველა მოძალადე და სექსუალურად შემვიწროებელი უნდა დაისაჯოს მაქსიმალურად და სრულად.
• აჯარო აქტივობებიდან ჩანდა, რომ ლევან იოსელიანი ბოლო კვირის განმავლობაში არაერთ შეხვედრაზე იმყოფებოდა და რამდენიმე პოსტიც დადო, თუმცა ამ თემაზე ომბუდსმენის აპარატმა მხოლოდ დღეს, კრიტიკის შემდეგ დაპოსტა.

დეტალები: სახალხო დამცველი თანადგომას უცხადებს "ძალადობის სავარაუდო მსხვერპლებს და, როგორც დისკრიმინაციის წინააღმდეგ ბრძოლის მექანიზმი, გამოთქვამს სრულ მზადყოფნას, მათი სურვილისა და მომართვის შემთხვევაში, ინსტიტუტის მანდატის ფარგლებში შეისწავლოს მათი ინდივიდუალური საქმეები".

• გარდა ამისა, ომბუდსმენი წერს, რომ ეს არ არის პირველი შემთხვევა, როდესაც საზოგადოების და პოლიტიკოსების ნაწილი აგრესიას სავარაუდო მსხვერპლებისადმი მიმართავს — მათ მონათხრობს უაპელაციოდ ეჭვქვეშ აყენებენ, მიუთითებენ, რომ მათ სექსუალურ შევიწროებაზე საუბარი მხოლოდ წლების შემდეგ დაიწყეს, რისი მიზანიც სავარაუდო შემავიწროებლის რეპუტაციის შელახვაა, სავარაუდო შემავიწროებელს კი მხარდაჭერას უცხადებენ.
• ამ ნაწილით ის, სავარაუდოდ, ქართული ოცნების წევრების, კერძოდ, მამუკა მდინარაძისა და ნინო წილოსანის განცხადებებს ეხმაურება, რომლებმაც ირიბი მხარდაჭერა გამოუცხადეს რამიშვილს.
• "საქართველოს სახალხო დამცველის შეფასებით, საზოგადოების წევრების და განსაკუთრებით, პოლიტიკოსების მსგავსი გამონათქვამები კიდევ მეტად აძლიერებს ძალადობის მსხვერპლების მიმართ ისედაც არსებულ სტერეოტიპებს, ახალისებს მათ მიმართ დისკრიმინაციას და დამატებით სოციალურ ბარიერს უქმნის, რომ მომავალში საკუთარ მძიმე გამოცდილებებზე ისაუბრონ და მიმართონ შესაბამის სამართლებრივ მექანიზმებს", — ვკითხულობთ განცხადებაში.

რას წერს სამხარაძის წინააღმდეგ დაწყებულ კამპანიაზე: სახალხო დამცველი თემის მნიშვნელობისა და სენსიტიურობიდან გამომდინარე, მედია საშუალებებს მოუწოდებს, რომ პატივი სცენ საქართველოს კონსტიტუციით დაცულ პირადი ცხოვრების, სივრცის და კომუნიკაციის ხელშეუხებლობის უფლებებს.

• "გაითვალისწინონ საქართველოს "მაუწყებლობის შესახებ" საქართველოს კანონის ვალდებულება, რომელიც მაუწყებლებს ავალდებულებს მიიღონ ყველა ზომა, ეთერში გაჟღერებული ფაქტების ჯეროვანი სიზუსტის უზრუნველსაყოფად და დროულად შეასწორონ შეცდომები", — ვკითხულობთ განცხადებაში.
• ამასთანავე, სახალხო დამცველი აცხადებს, რომ დაინტერესდება სისხლის სამართლის გამოძიების მსვლელობით, რომელიც, "კერძო პირის განცხადებით, ცრუ შეტყობინების საფუძველზე დაიწყო".
• საუბარია POSTV-ის სიუჟეტზე, რომლის წარმომადგენლები ენმ-ის წევრს დიმიტრი ჩიქოვანს მიუვარდნენ სახლში და ამტკიცებდნენ, თითქოს მან თათია სამხარაძე გაიტაცა — ეს უარყო როგორც ჩიქოვანმა, ასევე სამხარაძემ.
• დასასრულს, სახალხო დამცველი შეახსენებს საზოგადოებას, რომ დაუშვებელია და მიუღებელია ჟურნალისტთა მიმართ ნებისმიერი სახის ძალადობა — სავარაუდოდ, ის ნათია ბერიძეს გულისხმობს, რომელიც თაბაშირიან ფოტოს ავრცელებს და ამბობს, რომ ხელი დიმიტრი ჩიქოვანმა დაუზიანა.

სექსუალური შევიწროება არის არასასურველი სექსუალური ხასიათის ქცევა, რომელიც მიზნად ისახავს ან იწვევს ღირსების შელახვას და ქმნის დამაშინებელ, მტრულ, დამამცირებელ ან შეურაცხმყოფელ გარემოს.

• კანონის მიხედვით, სექსუალური ხასიათის ქცევად მიიჩნევა სექსუალური ხასიათის ფრაზების თქმა ან/და მიმართვა, გენიტალიების ჩვენება ან/და სექსუალური ხასიათის სხვა ნებისმიერი არასიტყვიერი ფიზიკური ქცევა.

• იმ შემთხვევაში, თუ მიიჩნევთ, რომ სექსუალურად შეგავიწროვეს სამსახურში, უნდა მიმართოთ სასამართლოს ან სახალხო დამცველს, ხოლო თუ ეს მოხდა საჯარო სივრცეში — პოლიციას.

• სექსუალური შევიწროება ადმინისტრაციულ სამართალდარღვევათა კოდექსით ისჯება და არ არის სისხლის სამართლის დანაშაული.

• საზოგადოებრივ ადგილებში პირის მიმართ არასასურველი სექსუალური ხასიათის ქცევა ჯარიმდება 300 ლარით, ხოლო ადმინისტრაციული სახდელის დადებიდან 1 წლის განმავლობაში განმეორების შემთხვევაში — 500 ლარით, შესაძლებელია გამასწორებელი სამუშაოებიც ერთ თვემდე ვადით.

• იგივე ქმედება არასრულწლოვანის, ორსულის, უმწეო მდგომარეობაში მყოფის, შეზღუდული შესაძლებლობების მქონე პირის მიმართ ან არასრულწლოვანის თანდასწრებით — გამოიწვევს დაჯარიმებას 500-დან 800 ლარამდე ოდენობით.

• ერთი წლის განმავლობაში გამეორების შემთხვევაში გამოიწვევს 800-დან 1 000 ლარამდე ოდენობით ჯარიმას, ან გამასწორებელ სამუშაოებს ერთ თვემდე ვადით, ან ადმინისტრაციულ პატიმრობას 10 დღემდე ვადით.