ილია მეორე მსოფლიო პატრიარქ ბართლომე I-ს წერილით მიმართა და კიევ-პეჩერის ლავრის საკითხზე "არსებული დაძაბულობის" განმუხტვაში მონაწილეობის მიიღება სთხოვა.

რატომ არის მნიშვნელოვანი: უკრაინის მართლმადიდებელ ეკლესიას ავტოკეფალია 2019 წლის მიენიჭა, მანამდე ის მოსკოვის საპატრიარქოს შემადგენლობაში იყო.

  • ავტოკეფალიის მიუხედავად მოსკოვის საპატრიარქოს დღემდე ექვემდებარება უკრაინის მართლმადიდებელი ეკლესიის ნაწილი.
  • რუსეთის პატრიარქი ღიად უჭერს მხარს ომს, ის პუტინთან დაახლოებული პირი და მისი პოლიტიკის გამტარებელია.
  • კიევ-პეჩერის ლავრა მოსკოვის საპატრიარქოს დაქვემდებარებული უკრაინის ეკლესიის რეზიდენცია იყო.
  • უკრაინის მოსკოვის საპატრიარქოს მიტროპოლიტი ონოფრე, რომელიც კიევ-პეჩერის ლავრას ხელმძღვანელობდა ომს გაემიჯნა და 24 თებერვალს პუტინს მოუწოდა, შეეწყვიტა "ძმათამკვლელი" ომი.
  • ომის დაწყების შემდეგ ქვეყნის მთავარი მართლმადიდებლური კომპლექსი უკრაინის მართლმადიდებელი ეკლესიად დაარეგისტრირეს და შესაბამისად, მიტროპოლიტ ონოფრესაც ჩამოერთვა.

უკრაინას გადაწყვეტილი აქვს, რუსეთთან დაკავშირებული რელიგიური ორგანიზაციების საქმიანობა აკრძალოს.

  • რუსეთის სპეცსამსახურებისთვის მუშაობის ბრალდებით ქვეყანაში არაერთი სასულიერო პირია დაკავებული.
  • უსაფრთხოების სამსახურმა და პოლიციამ არაერთ მონასტერში, მათ შორის, კიევ-პეჩორის ლავრაში ჩხრეკა ჩაატარა.
  • პრეზიდენტ ზელენსკის განცხადებით, არასდროს არავის მისცემენ უფლებას, ააშენონ რუსული იმპერია უკრაინულ სულში.
  • ზელენსკიმ პერსონალური სანქციები დაუწესა რუსეთის ფედერაციის გავლენის ქვეშ მყოფ ზოგიერთი რელიგიური ორგანიზაციის წარმომადგენელს.

რა უნდა ილია მეორეს: საქართველოს ეკლესიის უკრაინის ავტოკეფალია ამ დრომდე არ უღიარებია.

  • მსოფლიო პატრიარქისადმი გაგზავნილ წერილში ის ამბობს, რომ წუხს უკრაინის მართლმადიდებელ ეკლესიაში ამჟამად არსებული მდგომარეობის გამო.
  • ამტკიცებს, თითქოს ესმის, რომ ეკლესიასთან მიმართებაში ომში მყოფ უკრაინის ხელისუფლებას აქვს თავისი პოზიცია და "რელიგიურ სიღრმეებს ნაკლებად ითვალისწინებს".
  • მისი განცხადებით, ის ფაქტი, რომ ონოფრე სინოდალური გადაწყვეტილებით გაემიჯნა რუსეთის ეკლესიას და გარკვეული ნაბიჯებიც გადადგა მოლაპარაკებებისათვის, მნიშვნელოვანია.
  • "ამ ეკლესიის მხრიდან ამა თუ იმ საეკლესიო საკითხისადმი ერთგულება საუკუნეების განმავლობაში აღიარებული სულიერი ცხოვრების წესის დაცვით არის განპირობებული და სულაც არ ნიშნავს სხვა ეკლესიის უპირობოდ მორჩილებას", — წერს ილია მეორე.

გარდა ამისა, საქართველოს პატრიარქი წერს, რომ უკრაინის მართლმადიდებელი ეკლესია მრავალი მხრიდან ძალიან მძიმე მდგომარეობაში აღმოჩნდა.

  • მიმართავს მსოფლიო პატრიარქს ხელი შეუწყოს დაძაბულობის განმუხტვას — "რაც, ჩვენი აზრით, პირველ ეტაპზე გულისხმობს მშვიდობიანი თანაცხოვრების პირობების შექმნას, შემდგომ კი, ურთიერთდაახლოებისკენ მშვიდობიან სვლას".
  • "მართლმადიდებელი სამყარო დღეს არაერთი სერიოზული გამოწვევის წინაშეა და ამ ფონზე ყოველი სასიკეთო ნაბიჯი დიდად ფასეული იქნება", — წერს ის.

მსოფლიო პატრიარქმა არა ერთხელ ღიად დააფიქსირა საკუთარი პოზიცია.

  • მან ომის დანაშაულებზე პასუხისმგებლობას რუსეთის მართლმადიდებელ ეკლესიასაც დააკისრა.
  • პატრიარქის თქმით, რუსეთის ხელისუფლებამ ეკლესია თავისი სტრატეგიული მიზნების განხორციელების ინსტრუმენტად აქცია.

  • "რუსეთის ეკლესია და სახელმწიფო ხელმძღვანელობა თანამშრომლობდნენ აგრესიის განხორციელებაში და იზიარებს პასუხისმგებლობას ჩადენილ დანაშაულებზე, კერძოდ უკრანელი ბავშვების გატაცებაზე", — აღნიშნა მან.