ამის შესახებ საქართველოს პრეზიდენტმა TV პირველთან ისაუბრა.

დეტალები: ზურაბიშვილმა თქვა, რომ წერილი დღეს, 24 მარტს მიიღო.

  • როგორც თავად ამბობს, უკრაინის პრეზიდენტი საქართველოს მადლობას უხდის გაეროში სხვადასხვა რეზოლუციებზე დაფიქსირებული პოზიციისთვის.
  • ზურაბიშვილის განცხადებით, წერილში იყო მინიშნება, რომ გლობალურ სამშვიდობო სამიტზე საკუთარი ადგილი საქართველოსაც ექნება.
  • "ამას სრულიად ვემხრობი, ყველას ამას ვეუბნები. აუცილებელია, როცა დადგება დრო და ეს უკრაინის გადასაწყვეტია, როცა ჩათვლის, რომ თავისი ტერიტორია დაიბრუნა და ამის მიღწევამდე უკრაინა არ დათანხმდება";
  • "როცა იქნება ამგვარი გლობალური სამიტი, გლობალური მოლაპარაკებები, იქ აუცილებელია, ერთი რამე იყოს მიღწეული — რუსეთი გავიდეს ყველ იმ ტერიტორიიდან რომელიც აქვს ოკუპირებული და რომელიც არ არის მისი", — აცხადებს ის.

გარდა ამისა, ზურაბიშვილმა თქვა, რომ რუსეთმა უკვე წააგო ეს ომი.

  • "ვერ შეასრულა თავისი ომის ვერც ერთი მიზანი ამ ერთი წლის მანძილზე";
  • "დაკარგა თავისი რეპუტაცია, რომ იყო თითქოს ძლიერი სამხედრო შესაძლებლობის ქვეყანა";
  • "არავინ არ იცის, რა იქნება საბოლოო შედეგი, მაგრამ ბევრი ბრძოლა უკვე წააგო", — ამბობს ზურაბიშვილი.
  • როგორც პრეზიდენტი ამბობს, ომის შედეგად, რუსეთმა უნდა დაივიწყოს იმპერიალისტური მიზნები.

რატომ არის მნიშვნელოვანი: უკრაინაში რუსეთის არაპროვოცირებული, სრულმასშტაბიანი შეჭრის შემდეგ, საქართველოს ხელისუფლების მხრიდან არაერთგვაროვან განცხადებებს ვისმენთ.

  • ამ დრომდე კიევში ოფიციალური ვიზიტით, მხოლოდ პარლამენტის თავმჯდომარე იმყოფებოდა.
  • საქართველოს ოფიციალური პირებიდან ყველაზე მკაფიო პოზიცია პრეზიდენტმა დააფიქსირა და არაერთხელ თქვა ისიც, რომ უკრაინაში ჩასვლა სურდა, თუმცა იყო გარკვეული პრობლემები.