"აქ ამ დისკუსიის დროს, დარბაზში მესმოდა შეძახილები, სამშობლოს გაყიდვაა არ შეიძლება, მიწის გაყიდვა დედა სამშობლოს გაყიდვაა. მე მინდა გაგიმეოროთ ეს კითხვა, მე ვერ გავიგე არასასოფლო-სამეურნეო მიწა დედა სამშობლოა არ არის? მაგ ნაწილს რატო ყიდით დედასამშობლოსი? და დედასამშობლოს იჯარით გაცემა შეიძლება? იქნებ ამიხსნას უმრავლესობის წარმოდგენილმა აქ რომ გამოვა?! და ორგანულ კანონში გამონაკლის რო აწესებს ეგ რას ნიშნავს? გამონაკლის შემთხვევაში სამშობლოს გაყიდვა კარგია? ექსკლუზივი გინდათ სამშობლოს გაყიდვაზე? მე გეტყვით მარტო ერთ რამეს, შემდეგ არჩევნებზე თქვენ [ქართული ოცნება და პატრიოტთა ალილანსი] ერთ ბლოკად გამოდით, აღარ გინდათ ეს ცალკე სატელიტები რა, ერთად იყავით, ეს ნაციონალისტ-პატრიოტ-სოციალისტ-კომუნისტები და სლოგანი გქონდეთ ასეთი: სიბნელე, უვიცობა, ფარისევლობა! აი ეს შეგეფერებათ თქვენ!" - ეს განცხადება ევროპული საქართველოს წევრმა, გიგა ბოკერიამ პარლამენტის პლენარულ სხდომაზე გააკეთა, სადაც უცხო ქვეყნის მოქალაქეებზე საქართველოს ტეროტირაზე არსებული მიწის გაყიდვის აკრძალვას განიხილავდნენ.

უცხოელებზე მიწის მიყიდვის აკრძალვის კანონპროექტი 30 მაისს, საპარლამენტო უმრავლესობის, ქართული ოცნების წევრებმა შეიტანეს, რომლის მიხედვით, იკრძალება საქართველოს მოქალაქეობის არ მქონე პირებისთვის სასოფლო-სამეურნეო დანიშნულების მიწის მიყიდვა.

საქართველოს მოქმედი კანონმდებლობით, უცხო ქვეყნის მოქალაქეებს საქართველოში სასოფლო-სამეურნეო მიწის ყიდვაზე შეზღუდვები არ აქვთ. თუმცა, კონსტიტუციის პროექტით, საქართველოს კონსტიტუციაში მიწასთან დაკავშირებით ჩანაწერი ჩნდება, რომლითაც "მიწა არის უნიკალური რესურსი", რომლის გასხვისების წესების განსაზღვრაც კანონმდებლობაში იგეგმება.