ლტოლვილთა და განსახლების მინისტრს, სოზარ სუბარს ეჭვი ეპარება, რომ აფგან მუხტარლის დევნიდნენ საკუთარ ქვეყანაში, ვინაიდან მას არ მიუმართავს დევნილთა სამინისტროსთვის:

"ის აუცილებლად მიიღებდა თავშესაფარს ან საქართველოში ან სხვა ქვეყანაში, თუკი დადასტურებული იქნება, რომ მის მიმართ არის დევნა. ის რომ მას ორი წლის განმავლობაში არ მოუმართავს არც ჩემთვის არც გაეროს ლტოლვილთა უმაღლესი კომისარიატისთვის, ეს მაფიქრებინებს, რომ მის მიმართ დევნა არ არსებობდა".

ამის შესახებ, სუბარმა დღეს, 15 ივნისს მთავრობის სხდომის დასრულების შემდეგ განაცხადა:

"თბილისის ნებისმიერ უბანში, ყველაზე მიყრუებულშიც კი, არ ვამბობ ჩიტაძის ქუჩას, ადამიანს რომ დახვდეს ვინმე, თავზე ტომარა ჩამოაცვას და ჩატენონ მანქანაში ან საბარგულში, მინიმუმ 20-30 ადამიანი იქნება ვინც ამას აღბეჭდავს და ეს იქნება სოციალურ ქსელებში დაფიქსირებული".

დღეს, სტრასბურგში ევროპარლამენტის პლენარულ სესიაზე, ევროპარლამენტმა აფგან მუხტარლის საქმეზე რეზოლუცია მიიღო, სადაც აზერბაიჯანს დაკავებული ჟურნალისტის გათავისუფლებისკენ, საქართველოს კი გამჭვირვალე გამოძიებისკენ მოუწოდეს. დეპუტატები ასევე საუბრობენ იმაზე, რომ სესაძლოა საქართველოს, როგორც დამოუკიდებელ ქვეყანას, ამ საქმის გამო, რეპუტაცია შეელახოს.

რეზოლუციაში, ევროპარლამენტი საქართველოს ახსენებს ევროკონვენციის მე-3 მუხლს, სადაც წერია, რომ ქვეყანა ვალდებულია არ გადასცეს სხვა ქვეყანას ის პირი, რომელსაც შესაძლოა ემუქრებოდეს წამება, არაადამიანური ან დამამცირებელი მოპყრობა.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.