ამის შესახებ ორგანიზაციები ერთობლივ განცხადებას აქვეყნებენ.

რატომ არის მნიშვნელოვანი: მას შემდეგ, რაც რუსული კანონის საპროტესტო აქციაზე მშვიდობიანი მოქალაქეები სპეცრაზმმა წყლის ჭავლისა და ცრემლსადენი გაზის გამოყენებით დაშალა, ათობით ადამიანი დააკავეს.

  • შინაგან საქმეთა სამინისტრომ პროტესტის შემდეგ ადმინისტრაციული წესით დაკავებული ყველა პირი გაათავისუფლა.
  • თუმცა ორგანიზაციები ამბობენ, რომ მათ მიმართ საქმის წარმოება არ შეწყვეტილა.

დეტალები: NGO-ების თქმით, ადმინისტრაციული დაკავებიდან მათი გათავისუფლება არ გულისხმობს სამართალდარღვევის საქმის წარმოების შეწყვეტას. ამიტომ დაკავებიდან გათავისუფლების მიუხედავად, მათ მიმართ ადმინისტრაციული სამართალდარღვევის საქმის წარმოება ამ დრომდე მიმდინარეობს.

  • მათი თქმით, 2-3 მარტსა და 7-9 მარტს გამართულ საპროტესტო აქციებზე პოლიციამ, ადმინისტრაციული წესით, ჯამში 169 პირი დააკავა.

ორგანიზაციები უწყებებს მოუწოდებენ:

შინაგან საქმეთა სამინისტროს — აქციის მიმდინარეობისას დაკავებული ყველა პირის მიმართ, რომელთა საქმეებიც ამ დრომდე სასამართლოს არ განუხილავს, შეწყვიტოს ადმინისტრაციული სამართალდარღვევის საქმის წარმოება;

პროკურატურას — გამოიყენოს კანონმდებლობით გათვალისწინებული პროკურორის პროტესტით მიმართვის შესაძლებლობა, რათა გაუქმდეს სასამართლოს მიერ დაჯარიმების შესახებ მიღებული დადგენილებები;

სპეციალურ საგამოძიებო სამსახურს — უზრუნველყოს სამართალდამცავების მხრიდან არაპროპორციული ძალის გამოყენების, თვითნებური დაკავებების, დაკავებულთა მიმართ ძალადობისა და სხვა შემთხვევების სრულყოფილი და ობიექტური გამოძიება.

ხელმომწერი ორგანიზაციები:

  • საქართველოს ახალგაზრდა იურისტთა ასოციაცია
  • პარტნიორობა ადამიანის უფლებებისთვის-PHR
  • სამართლიანი არჩევნები (ISFED)
  • საერთაშორისო გამჭვირვალობა-საქართველო
  • ღია საზოგადოების ფონდი I Open Society Georgia Foundation
  • ადამიანის უფლებათა ცენტრი / Human Rights Center
  • საქართველოს დემოკრატიული ინიციატივა / Georgian Democracy Initiative
  • Women's Initiatives Supporting Group
  • Rights Georgia / უფლებები საქართველო