სტუდენტებმა პროტესტი დააფიქსირეს იმ აუდიტორიასთან, სადაც ქართული ოცნების თავმჯდომარე ლექციებს ატარებს.

რატომ არის მნიშვნელოვანი: გუშინ, 10 მარტს სტუდენტებს მიუვიდათ შეტყობინება, რომ დღევანდელი ლექცია არ ჩატარდებოდა. ეს მას შემდეგ მოხდა, რაც სტუდენტებმა გადაწყვიტეს, რომ კობახიძეს მშვიდობიანი აქციით დახვედროდნენ.

  • ინფორმაციის გავრცელებისთანავე On.ge ლექციის გადადების მიზეზის გასარკვევად თბილისის სახელმწიფო უნივერსიტეტის პრესსამსახურს დაუკავშირდა.
  • თსუ-ში გვითხრეს, რომ ფაკულტეტის ადმინისტრაციამ სტუდენტებს გაუგზავნა სტანდარტული მესიჯი ლექციის გადადების შესახებ.
  • "ეს ჩვეულებრივი, სტანდარტული ამბავია, თავად ლექტორის თხოვნით გადაიდო ლექცია", — განაცხადეს უნივერსიტეტში.

დეტალები: სტუდენტებმა ადგილზე საქართველოსა და ევროკავშირის დროშები მიიტანეს და გააკრეს პოსტერები წარწერებით, "კონსტიტუცია პრინციპებია", "ღალატს ვერ გამოითხოვ", "კონსტუტუციას ვერ წაგვართმევ" და სხვა.

  • გარდა ამისა, მიიტანეს კობახიძის წიგნები, წარწერით "საქართველო ევროპაა".
  • "ვთვლით, რომ მას არ აქვს მორალური უფლება, ესაუბროს სტუდენტებს და მით უმეტეს, ესაუბროს იმ საკითხებზე, რომელიც ჩვენს ქვეყანას ასე ძალიან სჭირდება", — ამბობენ სტუდენტები.