ესპანეთში მცხოვრები 48 წლის ქალი ყოფილი ქმრისგან 204 ათასამდე ევროს ($215 ათასი) მიიღებს ქორწინებაში შესრულებული და აუნაზღაურებელი სამუშაოსთვის. სასამართლოს გადაწყვეტილებით, ივანა მორალს ყოფილი პარტნიორი ყოველთვიურად გადაუხდის $528 დოლარს. აღნიშნული თანხა წყვილის ქორწინების პერიოდში ხელფასის მინიმალური ოდენობის მიხედვით განისაზღვრა.

მორალის თქმით, 25-წლიანი ქორწინების განმავლობაში საოჯახო საქმეებს მხოლოდ ის ასრულებდა. ამასთან, ქალი ჰყვება, რომ ამ პერიოდში არ ჰქონია პროფესიული კარიერის შექმნის შესაძლებლობა, რადგან მისი დრო მხოლოდ სახლსა და ოჯახზე ნაწილდებოდა. მისი ქმარი კი მხოლოდ პირადი ქონების გაზრდაზე ფიქრობდა.

სხვადასხვა გამოცემის მიხედვით, მორალის ქმარი სპორტულ დარბაზს ფლობდა და ძვირადღირებულ შენაძენებსაც არ ერიდებოდა. ამის მიუხედავად, ყოფილი ცოლის თქმით, კაცმა თავისი შვილის სწავლის გადასახადის დაფარვაც კი არ მოისურვა.

"აშკარაა, რომ ეს ძალადობა იყო", — აღნიშნავს მორალი, — "წლების განმავლობაში ჩემი დროის, ენერგიისა და სიყვარულის ოჯახისთვის გაღების მიუხედავად, ქორწინების დასრულების შემდეგ, მე და ჩემს შვილებს არაფერი დაგვრჩენია".

ქალი იხსენებს, რომ იგი საოჯახო საქმეების უმრავლესობას აგვარებდა, ამის მიუხედავად, ფინანსურ ნაწილზე წვდომა არასდროს ჰქონია — ყველაფერს ყოფილი ქმარი განკარგავდა.

მორალის ადვოკატის, მარტა ფუენტესის თქმით, სასამართლოს გადაწყვეტილება ხაზს უსვამს, როგორ რჩება ხოლმე ქალების შესრულებული სამუშაო ჩრდილში.

"[ყოფილ ქმარს] რომ თავის კარიერაზე ეზრუნა, ქალი შინ რჩებოდა და შვილებს უვლიდა", — ამბობს ფუენტესი, — "იგი ქმრის ჩრდილი გახლდათ, ზურგს უმაგრებდა, რომ პროფესიულად გაზრდილიყო და ვიღაც გამხდარიყო".

ეკონომიკური ძალადობა ოჯახში

ეკონომიკური ძალადობა ოჯახში ძალადობის ერთ-ერთი ყველაზე გავრცელებული ფორმაა. ეს მოიცავს საერთო დოვლათზე წვდომის შეზღუდვას და ფინანსების სრულიად დამოუკიდებლად განკარგვას. ეკონომიკური ძალადობის ერთ-ერთი იარაღია პარტნიორისთვის პროფესიული განვითარების შეზღუდვაც, მაგალითად, დასაქმების აკრძალვა. შედეგად, ქორწინების დასრულების შემთხვევაში, ძალადობის მსხვერპლი სულ არაფრით რჩება.

რამდენადაც ეკონომიკური ძალადობის უმრავლეს შემთხვევებში ქალებს საკუთარი სამსახური და შემოსავალი არ გააჩნიათ, მათი გაწეული შრომა საოჯახო საქმეებზე მართლაც ჩრდილში რჩება. საშინაო საქმეების შესრულება, რომელიც, წესით, თანაბრად უნდა ნაწილდებოდეს ურთიერთობაში მყოფ ადამიანებზე, აუნაზღაურებელი სამუშაოა.

ოჯახში ეკონომიკური ძალადობის სხვა ფორმებია ალიმენტის გადახდაზე უარის თქმა ან მემკვიდრეობაზე წვდომის შეზღუდვაც. თუმცა, ისეთ ქვეყნებში, როგორიც, მაგალითად, საქართველოა, კულტურული ფაქტორის გამო, ქალები ხშირად უარს ამბობენ, მსგავსი ტიპის ძალადობაზე ღიად ისაუბრონ ან შესაბამის სამსახურს მიმართონ.