გარემოსდაცვითი ზედამხედველობის დეპარტამენტის ინფორმაციით, მოქალაქემ მტკვრის სანაპიროზე და მდინარეში მანქანიდან 1მ3-მდე მოცულობის ფეკალური მასა დაღვარა, რაც დაახლოებით ათას ლიტრს შეადგენს.

ინციდენტი ქარელის რაიონის სოფელ ახალსოფელში მოხდა.

უწყების ცნობით, გარემოს დაბინძურების ფაქტზე ადმინისტრაციული სამართალდარღვევის ოქმი შედგა, მოქალაქე ადგილზე დააჯარიმეს და თუ ის აღნიშნულს არ გაასაჩივრებს, ნარჩენების მართვის კოდექსის 33-ე მუხლის მეორე ნაწილის თანახმად, 150 ლარის გადახდა მოუწევს.

გარემოსდაცვითი ზედამხედველობის დეპარტამენტის პრესსამსახურში ამბობენ, რომ მსგავსი შემთხვევები ხშირია.