ქაართული ოცნების განცხადებით, პოლიტიკური საბჭოს, ხალხის ძალისა და საპარლამენტო უმრავლესობის წევრებს შორის მიმდინარე პოლიტიკურ პროცესებთან დაკავშირებით კონსულტაციები გაიმართა.

რატომ არის მნიშვნელოვანი: გვიან ღამით რუსთაველზე პროტესტის მონაწილეების დარბევის შემდეგ გავრცელებულ საერთო განცხადებაში, რომელიც ქართული ოცნების ვებგვერდზე გამოქვეყნდა, აღნიშნულია, რომ მიღებულმა კანონპროექტმა აზრთა სხვადასხვაობა გამოიწვია, ამიტომ მათ მიერ მხარდაჭერილ კანონპროექტს უპირობოდ, ყოველგვარი დათქმის გარეშე გაიწვევენ.

  • თუმცა, მმართველ გუნდს დაპირებები აქამდეც მოუცია და არ შეუსრულებია, ამიტომ ოფიციალურად გაწვევამდე დაზუსტებით თქმა რთულია.

დეტალები: ოცნება ამტკიცებს, თითქოს საზოგადოების გარკვეული ნაწილი შეცდომაში "სიცრუის მანქანამ შეიყვანა" და კანონპროექტს რუსული კანონის ყალბი იარლიყი მიაკერეს, ხოლო მისი პირველი მოსმენით მიღება "საზოგადოების ნაწილის თვალში ევროპული კურსიდან გადახვევად წარმოაჩინეს".

  • პარტია პროტესტს ამჯერადაც "რადიკალურ ძალებს" უკავშირებს და აბრალებს, რომ მათ შეძლეს ისინი კანონსაწინააღმდეგო ქმედებებში ჩაეთრიათ.
  • სამართალდამცავებს კი, რომლებმაც გასულ ღამეს არაერთხელ იძალადეს მშვიდობიან დემონსტრანტებზე, "გმირებს" უწოდებს და მადლობას უხდის, რომ მათ "ძალადობას მოთმინებითა და უმაღლესი სტანდარტით უპასუხეს".
  • "ჩვენ ყველაზე მეტად უნდა გავუფრთხილდეთ მშვიდობას, სიმშვიდესა და ეკონომიკურ განვითარებას ჩვენს ქვეყანაში, ისევე, როგორც საქართველოს წინსვლას ევროპული ინტეგრაციის გზაზე. შესაბამისად, აუცილებელია, თითოეული ჩვენი თანამოქალაქის ენერგია არა დაპირისპირებაზე, არამედ ქვეყნის სწორი მიმართულებით განვითარებაზე დაიხარჯოს", — წერია განცხადებაში.

ოცნების განცხადებით, ემოციური ფონის ჩაცხრომასთან ერთად, საზოგადოებას უკეთ განუმარტავენ, თუ რას ემსახურებოდა კანონპროექტი და რატომ იყო მნიშვნელოვანი უცხოური გავლენის გამჭვირვალობის უზრუნველყოფა.

  • მათივე თქმით, ამ მიზნით მოსახლეობასთან შეხვედრებს დაიწყებენ, ამიტომ იმის თქმაც რთულია, რომ ამ კანონს ხელახლა არ დააინიცირებენ.

  • "ჩვენ ვმოქმედებთ იმ განსაკუთრებული პასუხისმგებლობით, რომელიც, როგორც მმართველ ძალას, საზოგადოების თითოეული წევრის წინაშე გვაკისრია. საქართველო შეინარჩუნებს მშვიდობასა და სტაბილურობას და განაგრძობს სვლას ღირსებით ევროპისკენ, რაც ქართული საზოგადოების პრინციპული არჩევანია", — წერს პარტია.