თბილისის საქალაქო სასამართლოში წვრილმანი ხულიგნობისა და პოლიციისადმი დაუმორჩილებლობის ბრალდებით დაკავებული სამოქალაქო აქტივისტებისა და სტუდენტების პროცესები მიმდინარეობს.

რატომ არის მნიშვნელოვანი: 2 მარტს პარლამენტში საგარეო ურთიერთობათა და თავდაცვისა და უშიშროების გაერთიანებულ კომიტეტის სხდომაზე რუსული კანონპროექტები განიხილებოდა.

  • მედიის და არასამთავრობო სექტორის წარმომადგენლებმა პარლამენტთან აქცია გამართეს, სადაც ხალხის ძალის მიერ ინიციირებული რუსულ კანონპროექტი გააპროტესტეს.
  • საგარეო და თავდაცვის კომიტეტებმა რუსულ კანონს მხარი დაუჭირეს, კანონპროექტი განსახილველად იურიდიულ კომიტეტს გადაეცა.
  • პოლიციამ აქციაზე 36 პირი, მათ შორის 2 ჟურნალისტი დააკავა. დაკავების მიზეზი გახდა აქტივისტების მხრიდან რუსული კანონპროექტის მხარდამჭერების მონებად და მოღალატეებად მოხსენიება.

დეტალები: ამ დრომდე ელოდებიან 7 დაკავებული პირისთვის სასამართლო სხდომის ჩანიშვნას.

  • დღის განმავლობაში მიმდინარეობს სხვა დაკავებულთა სასამართლო პროცესები.
  • აქტივისტთა მხარდამჭერები და ოჯახის წევრები მთელი დღის განმავლობაში სასამართლოს შენობასთან არიან შეკრებილები და მოსამართლის გადაწყვეტილებას ელოდებიან.

ქართული ოცნებიდან ფორმალურად წამოსული დეპუტატებით დაკომპლექტებულმა ანტიდასავლურმა მოძრაობამ, ხალხის ძალამ კანონპროექტი შეიმუშავა, რომლის მიზანიც მედიისა და არასამთავრობო ორგანიზაციების დისკრედიტაციაა.

  • მათ სურთ, შეიქმნას "უცხოური გავლენის აგენტების რეესტრი", სადაც დარეგისტრირდება ყველა არასამეწარმეო იურიდიული პირი და მედიასაშუალება, რომელთა შემოსავლების 20%-ზე მეტი უცხოეთიდან ფინანსდება.
  • მსგავსი კანონი მოქმედებს რუსეთში — ქართველი დეპუტატების მსგავსად, ოკუპანტი ქვეყნის საკანონმდებლო ორგანო მის მიღებას მოქალაქეების ინტერესების, ქვეყნის უსაფრთხოებისა და სუვერენიტეტის "უცხოური გავლენებისგან" დაცვის მოტივით ხსნიდა, საბოლოოდ, კი კრემლმა მედიების, ორგანიზაციებისა და თავისუფალი სიტყვის წინააღმდეგ გამოიყენა.

კანონპროექტთან დაკავშირებით შეშფოთება გამოთქვეს საერთაშორისო და ადგილობრივ დონეზე.

  • საქართველოს პარტნიორი ქვეყნები და ევროსტრუქტურების წარმომადგენლები ერთხმად აცხადებენ, რომ კანონპროექტის ნებისმიერი ფორმით მიღება ქვეყნის ევროატლანტიკურ მომავალს საფრთხის ქვეშ დააყენებს.
  • ამ განმარტებების, მოწოდებებისა და მიმართვების ფონზე, კანონპროექტზე გამიჯვნის ნაცვლად, მმართველ გუნდში აცხადებენ, რომ მას მხარს დაუჭერენ.