დემონსტრანტებმა, რომლებიც სასამართლო რეფორმებს აპროტესტებენ, თელ-ავივში რამდენიმე ქუჩა გადაკეტეს.

რატომ არის მნიშვნელოვანი: მომიტინგეები თვლიან, რომ პარლამენტში შემავალი ცვლილებები შეაფერხებს სასამართლო დამოუკიდებლობას და დემოკრატიას საფრთხეს შეუქმნის.

  • იუსტიციის სისტემაში ცვლილებები ისრაელის ახალი ნაციონალისტურ-რელიგიური კოალიციის პოლიტიკის ქვაკუთხედია.
  • კრიტიკოსების შეფასებით, ცვლილებები მიზნად ისახავს მოსამართლეების არჩევანზე გადამწყვეტი გავლენის მოპოვებას და უზენაესი სასამართლოს უფლებამოსილების შეზღუდვას.

დეტალები: პოლიციამ პროტესტის მონაწილეების დასაშლელად წყლის ჭავლი და ყუმბარები გამოიყენა.

  • ინტერნეტში გავრცელდა დემონსტრანტების დაკავების კადრები, სადაც ისინი დაჩოქილები არიან დაკავების პროცესში, ან ძალის გამოყენებით გამოჰყავთ პროტესტიდან.
  • ეროვნული უსაფრთხოების მინისტრმა მხარი დაუჭირა დემონსტრაციის დასაშლელად გამოყენებულ ზომებს და განაცხადა, რომ " [პოლიციამ] უნდა გამოიყენოს ყველა საშუალება, რათა შეინარჩუნოს საზოგადოებრივი წესრიგი და ისრაელის მოქალაქეების ყოველდღიური რუტინა".
  • "პროტესტის უფლება არ არის ანარქიის უფლება", — განაცხადა ისრაელის პრემიერ მინისტრმა, ბენჯამინ ნეთანიაჰუმ.
  • პრეზიდენტი ისააკ ჰერცოგი აცხადებს, რომ ქვეყანა კონსტიტუციური და სოციალური დაშლის ზღვარზეა და მთავრობასა და ოპოზიციას შორის დიალოგის ინიციირებას ცდილობს.
  • კანონპროექტი დაგმო ისრაელის ბევრმა უცხოელმა მოკავშირემ.