The Last Of Us ყოველ ახალ სერიასთან ერთად უფრო და უფრო საინტერესო ხდება. თუმცა სერიალის სიუჟეტი ერთადერთი რამ არაა, რაც ფანებს განსაკუთრებით მოსწონთ. მე-6 სერიაში მენსტრუალური ჭიქის გამოჩენამ ინტერნეტში დიდი მოწონება დაიმსახურა და სოციალური ქსელების მომხმარებლებმა იმ ფაქტს გაუსვეს ხაზი, რომ მენსტრუაციას ბევრ შოუსა თუ ფილმში არავინ ახსენებს.

მე-6 სერიაში ტომი და მისი პარტნიორი მარია ელისა და ჯოელს თავშესაფარსა და ახალ ტანსაცმელს სთავაზობენ. ტანსაცმელთან ერთად მარია ელის მენსტრუალურ ჭიქასაც უტოვებს, რომელსაც მცირე ინსტრუქციაც ახლავს. ელი მენსტრუალურ ჭიქას პირველად ხედავს და როცა მიხვდება რისთვისაა, ამბობს, რომ "ეს საზიზღრობაა". ფანების აზრით, ეს 14 წლის გოგოს ზუსტი რეაქციაა და სერიალებში ამ საკითხზე უფრო ხშირი საუბარი მნიშვნელოვანია.

ფოტო: HBO

"პოსტაპოკალიფსურ პერიოდში შემაშფოთებელია, რომ მენსტრუაციასთან გამკლავებაც გიწევს, რისთვისაც ბევრი ვარიანტი არ გაქვს. რატომ არ უნდა ვაჩვენოთ ეს? მით უმეტეს, პერსონაჟი 14 წლის გოგოა და ეს მისი ცხოვრების ნაწილია", — განაცხადა პროექტის წარმომადგენელმა, კრეიგ მაზინმა.

მე-6 სერია სოციალურ ქსელებშიც განხილვის საგანი იყო. "The Last Of Us-ით აღფრთოვანებული ვარ. როგორც იქნა, ვიღაცამ გვაჩვენა, თუ როგორ უმკლავდებიან მენსტრუაციას აპოკალიფსის დროს", — წერს ტვიტერის ერთ-ერთი მომხმარებელი. " ამ კვირის The Last Of Us-ში მენსტრუალური ჭიქა ისაა, რისი ნახვაც დიდი ხანია, გვსურდა", — ვკითხულობთ კომენტარებში.

შეგახსენებთ, რომ HBO-ს ახალი სერიალი The Last Of Us 2013 წლის ვიდეოთამაშითაა შთაგონებული და მასზე ჩერნობილისა და აღნიშნული ვიდეოთამაშის შემქმნელები მუშაობენ. პედრო პასკალისა და ბელა რემზის პერსონაჟები პოსტაპოკალიფსურ სამყაროში ცხოვრობენ და მაყურებელს დაუვიწყარ თავგადასავალს ჰპირდებიან.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…

ასევე იხილეთ: