ისინი განცხადებას სოციალურ ქსელში ავრცელებენ.

რატომ არის მნიშვნელოვანი: 4 თებერვალს, ეროვნულ გალერეაში, კულტურის ცენტრ ათინათის გამოფენის გახსნაზე, მხატვარმა სანდრო სულაბერიძემ საკუთარი ნამუშევარი ჩამოხსნა და მის ნაცვლად, კედელზე დატოვა წარწერა — "ხელოვნება ცოცხალი და დამოუკიდებელია".

• ფაქტზე შსს-მ გამოძიება ქურდობის მუხლით დაიწყო, რაც სასჯელის სახით 1-დან 2 წლამდე შინაპატიმრობას ან თავისუფლების 3-დან 5 წლამდე აღკვეთას ითვალისწინებს.
• სულაბერიძის მხარდასაჭერად 12 თებერვალს აქციაც გაიმართა.
• მომხდარს გამოეხმაურა ახალგაზრდა იურისტთა ასოციაციაც და თქვა, რომ გამოძიების დაწყება ქურდობის მუხლით არასწორია.
• მოგვიანებით მხატვარმა შოთა აფციაურმა ეროვნული გალერეიდან ნამუშევრის გატანა მოითხოვა, რომელსაც კიდევ ერთი ხელოვანი შეუერთდა.
• მოგვიანებით გამოფენის კურატორმა მხატვრებს უპასუხა, რომ თუ ვინმეს გალერეიდან ნამუშევრების წაღება უნდა, წაიღოს.

რას ამბობს მუზეუმი: ამბობენ, რომ მხატვარ სანდრო სულაბერიძის მიერ საგამოფენო დარბაზში კედლის დაზიანებისა და თავისი ნახატის ჩამოხსნის, შეუთანხმებლად გატანის ფაქტის შემდეგ, სოლიდარობის მიზნით, რვა მხატვარმა მოისურვა ექსპოზიციიდან თავიანთი ნამუშევრების ამოღება.

• რაც კულტურის ცენტრ ATINATI’S-სა და ეროვნულ გალერეას შორის ხელმოწერილი ხელშეკრულების თანახმად, შეუძლებელია.
• თუმცა მხატვარი შოთა აფციაური ამბობს, რომ გამოფენამდე არ მოუწერია ხელი არც ერთი იურიდიული დოკუმენტისთვის.
• მათი თქმით, მხატვრებისთვის გამოსავლის შეთავაზების მიზნით, საქართველოს ეროვნულმა მუზეუმმა მიიღო გადაწყვეტილება, გამოფენა დასრულდეს 20 თებერვალს, 12 მარტის ნაცვლად და გაიხსნას სხვა, მომდევნო გამოფენა.
• "გვსურს, დისკომფორტისთვის ბოდიში მოვუხადოთ როგორც გამოფენის სხვა მონაწილეებს, ვისაც არ გამოუთქვამთ ნამუშევრის გატანის სურვილი, ისე - დამთვალიერებელს", — ნათქვამია განცხადებაში.

გარდა ამისა, ტექსტში ვკითხულობთ, რომ მუზეუმი კულტურის ცენტრ ATINATI’S-ს მადლობას უხდის თანამშრომლობისათვის

• აღნიშნავს, რომ ეროვნულმა გალერეამ, ქვეყნის ერთ-ერთმა პირველმა საგამოფენო სივრცემ, ზოგიერთ ნაკლებად ცნობილ მხატვარს პირველად მისცა შესაძლებლობა, წარმოეჩინა თავისი ხელოვნება, რაც მანამდე არ გახლდათ მუზეუმის საგამოფენო პოლიტიკა.
• "სწორედ მხატვრების მიმართ სახელმწიფოს ასეთი მხარდაჭერა ემსახურება ხელოვნების თავისუფლებასა და დამოუკიდებლობას. დასანანია, რომ ზოგიერთმა მხატვარმა ეს შესაძლებლობა პოლიტიკური მიზნებისათვის გამოიყენა", — ვკითხულობთ განცხადებაში.

რას ამბობს ნინო ლომჯარია: ყოფილი სახალხო დამცველი ამბობს, რომ ზაფხულში ხვდებოდა მუზეუმის მკვლევრებსა და მეცნიერებს, რომელთაგანაც შემაშფოთებელი ფაქტები მოისმინა.

• "დაკითხვები ხდება, რომელიც, რაღაც რეპრესიების სახეს იღებს. კითხავენ საათების განმავლობაში ადამიანებს და აფრთხილებენ სისხლის სამართლის დანაშაულებზე, რომელიც წარმოუდგენელია,რაც ზეწოლისა და დაშინების მიზანს ემსახურება", — თქვა ლომჯარიამ.
• ამბობს, რომ ბოლო შემთხვევა ძალის დემონსტრირების შემთხვევაა, რომ კულტურის სამინისტრო აქციონ რეპრესიულ ძალად, თავისუფლების გამოხატულების დათრგუნვა ხდება.