საქართველოს საზოგადოებრივი მაუწყებელი სპორტული არხის გაკეთებას გეგმავს. ამის შესახებ On.ge-სთვის ცნობილი სამეურვეო საბჭოს სხდომაზე გახდა ცნობილი. საკითხზე საუბარი სამეურვეო საბჭოს წევრმა, მარინა მუსხელიშვილმა დაიწყო.

სხდომაზე მუსხელიშვილმა აღნიშნა, რომ სპორტული არხის გაკეთება საზოგადოებრივი მაუწყებლის მეორე არხზე იგეგმებოდა.

"შეიძლება კარგი აზრია, შეიძლება ცუდი აზრია, ეს ყველაფერი უნდა გახდეს საზოგადოების განხილვის საგანი. იმიტომ, რომ მეორე არხი როგორი იქნება ამის კონცეფცია უნდა დადებულიყო წლის ბოლოს. სხვა ინფორმაცია არ მაქვს, მე ასე გავიგე, შეიძლება არასწორად გავიგე და ლაპარაკია საერთოდ სხვა არხის გახსნაზე, ჩემი ინტერპრეტაცია იყო, რომელიც შეიძლება სრულიად არასწორად გავიგე და დირექტორი საერთოდ სხვა რამეს გულისხმობდა," - განუცხადა მუსხელიშვილმა.

სამეურვეო საბჭოს წევრს მიაჩნია, რომ თუ გენერალური დირექტორი ახალი არხის გახსნას გეგმავს, მაშინ იმ პრიორიტეტებს უნდა დაეყრდნოს, რომელიც საზოგადოებას აქვს.

საზოგადოებრივი მაუწყებლის გენერალური დირექტორი, ვასილ მაღლაფერიძე ადასტურებს, რომ მაუწყებელი გეგმავს საზოგადოება სპორტის გაკეთებას და ამ მიმართულებით მუშაობენ. კითხვაზე - ჩაანაცვლებს თუ არა სპორტული არხი დღევანდელ მეორე არხს - მაღლაფერიძე ასე პასუხობს:

"ამას არ აქვს მეორე და მესამე არხი, არის საზოგადოება სპორტი, თუ იქნება. საზოგადოებრივი მაუწყებელი გეგმავს რამდენიმე მიმართულების გაშვებას, ერთ-ერთი არის საზოგადოება სპორტი, როცა ამის შესაძლებლობა იქნება," - ამბობს მაღლაფერიძე, რომელიც განმარტავს, რომ მაუწყებელი პარლამენტის სხდომებს კვლავ გადასცემს.

მაღლაფერიძის არჩევიდან ზუსტად ერთ თვეში ცნობილი გახდა მისი გეგმის შესახებ, რომლითაც საინფორმაციო გამოშვების გარდა ყველა გადაცემის დახურვა იგეგმებოდა. დირექტორი გადაცემების დახურვას ფინანსების დაზოგვით ხსნიდა, რომელიც ტექნიკასა და შენობაზე უნდა დახარჯულიყო.

საზოგადოებრივი მაუწყებელი ერთხელ უკვე გეგმავდა ახალი არხის დამატებას. 2013 წლის სექტემბერში მაშინდელმა გენერალურმა დირექტორმა, გიორგი ბარათაშვილმა განაცხადა, რომ კულტურის არხის გახსნას გეგმავდნენ.