შინაგან საქმეთა მინისტრთან გამოძიებასთან დაკავშირებული კითხვა თეონა აქუბარდიას, ხათუნა სამნიძესა და ნინო ბუჩუკურს აქვთ.

რატომ არის მნიშვნელოვანი: გუშინ, 15 იანვარს ყვარელში საჯარო ლექციის ჩასატარებლად ჩასულ ლევან ბერძენიშვილს ძალადობრივმა ჯგუფებმა არ მისცეს ევრო-ატლანტიკური ცენტრის შენობაში შესვლის და ლექციის ჩატარების საშუალება.

  • შეკრებილები ამბობდნენ, რომ "ერეკლე მეფის მოღალატედ შერაცხავს" კახეთში არ ელოდნენ. როგორც ბერძენიშვილი ფორმულასთან ამბობს, ალტ-ინფოს ჟურნალისტმა მას უთხრა, რომ ეს პირები პრორუსული, ძალადობრივი და ჰომოფობიური დაჯგუფების, ალტ-ინფოს წევრები იყვნენ.

დეპუტატები დაინტერესდნენ დაიწყო თუ არა შსს-ის გენერალურმა ინსპექციამ მომხდარზე მოკვლევა, ხოლო საგამოძიება სამსახურმა გამოძიება.

  • "ვითხოვთ პასუხს გამოძიების დაწყებასთან დაკავშირებით, რაც არის სასიცოცხლოდ მნიშვნელოვანი ჩვენი დემოკრატიის და ჩვენი კონსტიტუციის დასაცავად", — განაცხადა აქუბარდიამ.
  • სამნიძის თქმით, მარგინალური, პრორუსული ჯგუფები დამოუკიდებლად არ მოქმედებენ და მათ ხელისუფლებისგან "მწვანე შუქი" აქვთ.
  • "ლევან ბერძენიშვილმა აღნიშნა, რომ არაფერი გაუკეთებია პოლიციას იმისთვის, რომ ის შეეყვანათ დარბაზში და ჩატარებულიყო ლექცია, რაც ადასტურებს, რომ პოლიციამ თავად დაარღვია კანონი", — აღნიშნა დეპუტატმა.

სხვა გამოხმაურებები: DRI-ს შეფასებით, მოძალადე ჯგუფების თავდასხმები ხელისუფლების წახალისებულია.

  • დროას ლიდერი ელენე ხოშტარიას განცხადებით, "ტყუილია, თითქოს ყვარელმა არ მიიღო ლევან ბერძენიშვილი, პირიქით, მას იქ ელოდებოდნენ, რის გამოც დააორგანიზეს ხალხი".
  • ის გამოდის ინიციატივით, დაორგანიზდნენ და გაემგზავრონ ყვარელში, რათა მოუსმინონ და მსურველებს მოასმენინონ ლევან ბერძენიშვილის ლექცია.