სავარაუდოდ, უკრაინისთვის ნასროლი რუსული რაკეტის ნაწილები მოლდოვის ტერიტორიაზე 14 იანვარს აღმოაჩინეს.

რატომ არის მნიშვნელოვანი: უკრაინის წინააღმდეგ რუსეთის ომის დაწყების შემდეგ ეს მესამე შემთხვევაა, როცა ოკუპანტი ქვეყნის რაკეტის ნამსხვრევები მოლდოვის ტერიტორიაზე ჩამოცვივდა.

  • პირველად ეს გასული წლის — 31 ოქტომბერს, მეორედ კი 5 დეკემბერს მოხდა.
  • ქვეყნის სამართალდამცავი უწყების განცხადებით, მოლდოვამ უკრაინასთან სასაზღვრო ზონაში პატრულების რაოდენობა გაზარდა და ტერიტორიის დასაცავად დაუყოვნებლივი ზომები მიიღო.

დეტალები: მოლდოვის პრემიერმინისტრმა, ნატალია გავრილიცამ მომხდარი დაგმო და უკრაინას მხარდაჭერა გამოუცხადა.

  • "არ არსებობს მშვიდობიანი მოსახლეობის მკვლელობისა და ინფრასტრუქტურაზე თავდასხმის პოლიტიკური, ისტორიული და მით უფრო, მორალური გამართლება. გამოვხატავ ჩემს ღრმა აღშფოთებას უკრაინაზე განხორციელებული ახალი მასიური თავდასხმის გამო. ჩემი მხარდაჭერა გმირი უკრაინელი ხალხისადმი და რუსეთის ბარბაროსული თავდასხმების მსხვერპლთა მიმართ", — დაწერა მან.

მოლდოვის პრეზიდენტმა, მაია სანდუმ მოვლენები ტვიტერზე შეაფასა.

  • მისი განცხადებით, რუსეთის სასტიკი ომი უკრაინის წინააღმდეგ პირდაპირ გავლენას ახდენს მოლდოვაზე.
  • "ჩვენ მკაცრად ვგმობთ რუსეთის დღევანდელ გაძლიერებულ თავდასხმებს და გვერდით ვუდგავართ მათ, ვინც დაკარგა ახლობლები დნიპროში და მთელს უკრაინაში. მშვიდობამ უნდა დაისადგუროს", — წერს სანდუ.