Bellingcat-ის საგამოძიებო ჯგუფის აღმასრულებელმა დირექტორმა, ხრისტო გროზევმა საჯაროდ მიმართა საქართველოს საგამოძიებო ორგანოებს და დახმარების მზაობა გამოთქვა.

რატომ არის მნიშვნელოვანი: მისი განცხადებით, ჟურნალისტები გაეცნენ ამერიკელი ტოქსიკოლოგის დასკვნას, რომელმაც გამოიკვლია ექსპრეზიდენტის ნიმუშები, გაიარა კონსულტაცია რუს ექსპერტებთან ქიმიურ იარაღზე და მივიდნენ დასკვნამდე, მისი მძიმე ლითონით მოწამვლის ვერსია სავარაუდოა.

  • ასევე, ამბობს, რომ არსებობს მოტივი — გროზევის თქმით, სააკაშვილი შეყვანილია FSB-სა და რუსეთის სხვა უწყებების მტრების სიაში, რომლებსაც შეეძლოთ ასეთი გადაწყვეტილების მიღება.

დეტალები: როგორც მან აღნიშნა, დარწმუნებულია, რომ საქართველოს ძალოვანი უწყებები ამ საქმის გამოძიებით დაინტერესებული არიან.

  • "ჩვენ მზად ვართ, დაგეხმაროთ, თუ მათ სურთ, გაგვიზიარონ მონაცემები — საეჭვო ადამიანების ნებისმიერი გადაადგილება, საზღვრის კვეთა და ყველაფერი, რაც მათი აზრით, საჭიროებს დამატებით გადამოწმებას".

სააკაშვილმა გამოძიებაში დახმარება გროზევს 6 იანვარს თავად სთხოვა. წერდა, რომ დიდი ხანია მისი საქმიანობის თაყვანისმცემელია, თუმცა ვერასდროს იფიქრებდა, რომ დახმარება დასჭირდებოდა.

  • "მე გწერთ ღიად, რადგან ჩემი კორესპონდენცია მაინც კონტროლდება. თუ შეგიძლიათ, გამოიძიოთ რუსეთისა და რუსეთთან აფილირებული მოძრაობები საქართველოში?".