ყოფილი სახალხო დამცველი პრეზიდენტის ბრიფინგზე არასამთავრობო ორგანიზაციების მიმართ კრიტიკულ განცხადებას ეხმაურება.

რატომ არის მნიშვნელოვანი: პრეზიდენტმა ბრიფინგი მას შემდეგ გამართა, რაც ორბელიანების სასახლესთან ექსპრეზიდენტის მოწინააღმდეგეებმა აქცია ჩაატარეს და მას მოუწოდეს, სააკაშვილი არ შეიწყალოს.

  • ზურაბიშვილმა ზეწოლაზე, ბულინგზე, შანტაჟსა და დამცირებაზე ისაუბრა — თქვა, რომ თავდასხმის სამიზნეა და იკითხა, სად არიან არასამთავრობო ორგანიზაციები, რომლებსაც ამაზე რეაქცია უნდა ჰქონდეთ.

ლომჯარიას განცხადებით, უფლებადამცველების ფუნქცია ძალაუფლებაში მყოფი პირების დაცვა მოქალაქეებისგან თუ პოლიტიკური ოპონენტებისგან არ არის, რაც არ უნდა მწვავე იყოს ოპონირება, ზეწოლა თუ პოლიტიკური თავდასხმა.

  • "ძალიან არასწორ პრაქტიკად ყალიბდება ხელისუფლების წარმომადგენლების მხრიდან მოწოდებები, რომ პოლიტიკური თავდასხმების დროს უფლებადამცველებმა თანამდებობის პირები უნდა დაიცვან".
  • "უფლებების დაცვა ნიშნავს ძალაუფლების მქონე პირებისგან ძალაუფლებაში არ მყოფი პირების, ანუ სუსტების დაცვას".

მისი განმარტებით, პრეზიდენტს იმხელა ძალაუფლება და კონსტიტუციური ბერკეტი (იუსტიციის საბჭოში გადამწყვეტი წევრის დანიშვნა, შეწყალება, საკონსტიტუციო სამართალწარმოება, ვენეციის კომისიისადმი მიმართვა ვეტოს უფლება და ა.შ) აქვს, რომ თავად შეუძლია მმართველი პარტიის წევრებზე ზეწოლის მოხდენა.

  • წერს, რომ ომბუდსმენობის პერიოდში თავადაც ხშირად სთხოვდნენ მინისტრების, თუ მმართველი პარტიის წევრების დაცვას, რაც უფლებადამცველობის არასწორი გაგება და ამ ცნებით მანიპულაციაა.
  • "ვფიქრობ, რომ ხელი არ უნდა შევუწყოთ ამ არასწორ განმარტებას".